VOV4.M’nông: Cư Êlang lah xã nkuăl jru bah nkuăl Ea Kar, n’gor Dak Lak, tâm êp ma xã Vụ Bổn, nkuăl Krông Pách, xã Cư Pui, nkuăl krông Bông ndrel êp ma xã Cư Bông nkuăl Ea Kar. Lĕ 3 xã tâm êp kŏ geh ntoh srê Covid-19 tâm ƀon lan. Êng Cư Êlang tâm nklang 3 xã geh srê, tơn rnơm nau nsum n’hâm bah ƀon lan đah ăp nau njrăng rdâng ân nâp bah n’gâng kan, xã hŏ mô geh nau kơp dơn nŭih ntưp srê, mât nâp rnă njrăng hun hao văng sa rêh jêng.

Ntŭk nkhah rgum tâm Ngih rđau kan bah nglau dak Ea Rớt, ngai đah nkuăl ƀon lan yơn lah geh nâp ueh. Aơ lah ntŭk nkhah đah ăp oh kon bah Cư Elang sĭt tă bah mpeh ba dâng gay ma njrăng rdâng srê Covi-19. Ƀư nau kan ta aơ, Groi Kruanh ngih dak si xã Cư Elang yuh Nguyễn Thị Yên mbơh, ntŭk aơ mhe geh ndâk ƀư jêng ntŭk nkhah rgum nŭih tâm khay 8. Bah năp nê, xã hŏ geh 2 ntŭk nkhah rgum tâm Ngih săm ƀŭt THCS Phạm Hồng Thái ndrel Ngih săm ƀŭt Tiểu học Nguyễn Thái Học. Rơh dŭt khay 7.2021, lĕ 2 ntŭk khah rgum aơ aơ ƀư nkhah 208 nŭih tă bah nkuăl geh srê. Geh ƀon lan ndrel du đê̆ nŭih geh nuih n’hâm lŏng kơl an ndơ sa, ăp nŭih đăp mpăn nau ƀư nkhah rgum tâm 14 nar, jêh nê lŏ nkhah tay tâm ngih 14 nar đŏng. Dŭt khay 8, knŭng hôm rlau 10 nŭih geh nkhah rgum nsum, geh hăn tât ngih rđau kan bah nglau dak Ea Rớt, mplŏ lơi ngih săm ƀŭt gay ma ân kon se nchrăp năm nti mhe. Yuh Nguyễn Thị Yến, mbơh, rnơm geh nau kơl an bah ƀon lan ndrel rmôt kan tâm Cư Elang hŏ njrăng rdâng srê geh nau dơi gay ma mô ân srê Covid-19 ntưp tâm xã:

‘Xã ntrŭnh ƀư ăp rmôt njrăng Covid-19 tâm ƀon lan, y tế thôn, ƀon, ban mât êng…ma rnôk saơ nŭih ntưp tă bah nkuăl srê tât, kơt lah Vụ Bổn, Cư Bông lah ân geh mbơh nkre, lah nsum ƀư ueh ngăn. Kơt lah nŭih mhe nơh, geh 2 nŭih tă bah Cư Bông lăp ngêt sa ta nê ri bu saơ ndrel hŏ leo nkhah tâm ntŭk nkhah rgum nsum. N’gâng kan dak si hŏ nkoch trêng mro, hôm ƀon lan ta nê ri nâp ngăn, ngăn lah kônh wa ri nơm ƀư ueh ngăn, khân păng mô geh du krap ôh”.

Tâm di kơt nau mbơh bah ngih dak si xã Cư Elang, nau mĭn bah nŭih ƀon lan kơl an xã njrăng rdâng srê ân nâp. Rnôk ê geh ntŭk nkhah rgum, nŭih ƀon lan tă bah n’gor geh srê sĭt Cư Elang ân ƀư rjăp nau nkhah êng tâm ngih, Rnôk ăp nkuăl mô ân hăn ro, kônh wa tâm xã kuăl điện thoại bonh đă oh kon mô sĭt, ƀư ueh nau tâm nkhah gay mô geh nau ntưp srê. Nô Vàng Seo Pao, tâm ntŭk ƀon mhe gŭ mrô 1-trong dak hoch Krông Pách Thượng, xã Cư Elang, mbơh:

‘Lah ma kŏ sĭt nkhah êng, ma tâm nê kŏ dôl ma nkhah, ri tĭng 2 hê ur sai hên mĭn ri ân bonh đă oh kon ân gŭ ta nkre ta nê, jêh aơ bah srê ri ân geh hăn pah kan tay. Lah bonh đă oh kon nơm ân gŭ ân ƀư ueh, mô dơi hăn lă lêng”.

Tĭng wa Trần Văn Thanh, Kruanh UBND xã Cư Elang, tâm rnoh 11 thôn, ƀon bah xã, ri ntŭk nkhah rgum êng mrô 1 hôm mâp nau jêr, yor du đê̆ kônh wa hôm dôl ntrơn hăn tât nkuăl rđŭng nglau tâm xã Cư San nkuăl Mdrak tât. Jrăng rdâng srê Covid-19, xã rgum ăp rmôt kan tâm ntŭk, ndâk 10 rmôt kan tâm pleh tâm kơl ndâk ngih, tâm nuih n’hâm “nŭih tât lor kơl nŭih tât ba kơi”.

Tâm lam nkuăl, xã ƀư ueh nau kan bah nŭih ƀon lan ndrel ăp rmôt nai dak si, dân quân, công an xã, mêt uănh nŭih luh lăp, ƀư ân rjăp nau ntrŭnh mbơh dak si. Nau tâm ban bah ƀon lan hŏ kơl an rgop kơl an Cư Elang njrăng geh nau dơi srê Covid-19 lăp, bol ma tâm 3 nkuăl geh srê lah xã Vụ Bổn, nkuăl Krông Pách, Xã Cư Pui bah nkuăl Krông Bông ndrel xã Cư Bông nkuăl Ea Kar. Wa Trần Văn Thanh lah tay:

‘Êng tâm dăch đah xã Vụ Bổn ri rnôk aơ phung hên dôl ma mât 4 ntŭk nkân njrăng, geh ăp rmôt kan mât njrăng êng bah thôn, dân quân ndrel công an xã, đă ƀư mô ân ăp rnăk tâm ƀon tâm nkuăl dôl geh ƀư nau rđau mrô 16 ri mô geh rlet nkuăl. Đah nkuăl tâm dăch ma xã Cư Bông ri phung hên geh ăp rmôt ƀư nau kan ntrơn hăn. Lam xã ri geh 50 rmôt covid tâm ƀon lan, ăp rmôt ƀư du nau kan, uănh ntơm 30-50 rnăk nsing tâm ăp thôn. Mât nau kan bah ăp rmôt ri vay geh mbơh klơ zalo, kơt lah nŭih geh nau nkhah ri rmôt nê gĭt da dê, mât njrăng bah thôn bu gĭt, lah saơ khân păng mô tâm kơt tĭng ndrel geh nau mô ueh êng ri nơm ân geh leo tât mrôt kan gay ma uănh năl ngăn bol ma măng mô lah nar”.

Mra dơi lah, đah ăp nau kan nsôih ngăn bah n’gâng kan, nau tâm ban nuih n’hâm bah kônh wa ăp rnoi, xã Cư Elang, nkuăl Ea Kar, n’gor Dak lak dôl mât ân nâp nkuăl mât êng ndrih kloh tâm nklang ntŭk dôl ma geh âk ngăn srê Covid-19, kơl an ƀon lan đăp mpăn nau rêh./.

Nŭih rblang: H’Thi