VOV4.M'nông: Tă khuch bah phŭt mbrô 5 lơh bôk khay 9 mhe aơ, ta nkuâl M’Drăk, n'gor Dak Lak, hŏ geh nău tât chôt si ntŭn pă tâm trong rse điện 22KV, lơh roh điện lam hvi ta ăp nkuâl Ea Kar n'hanh M'Đrăk. Tĭng n'gâng kan điện ta nkuâl, đah rlău 750km trong rse điện trung thế têk hăn rlău bri tăm, tâm khay mih phŭt, geh ma nău tơm si chôt ntŭn pă trong rse điện lah dŭt âk. N'gâng kan điện ŭch rŏng nuĭh tăm bri ân tĭng jăp, tâm rgop kan nsum lơn đŏng gay mât soih trong rse điện, der bah klach rvê tât săk nuĭh n'hanh drăp ndơ.

Tâm n'gul pơh khay 9, rnăk nô Vương Văn Hoàn, ta thôn 7, xã Cư San, leo ƀư koh tăch rlău 4ha tơm keo lai. Nô an gĭt, tă bah bri keo geh trong rse điện cao thế hăn rlău, jêng lor rnôk koh, rnăk păng ân mbơh an cán bộ điện lực tât ntĭm nti koh tơm si an đăp mpăn.

“Ta mir ri tăm tơm keo dơm. Bôk năp ri tăm rkĭt trong rse điện. Bah kơi nơh tăng nău nkoch trêng mbơh gĭt lam hvi bah điện lực ri mpôl hên muĭh kaih êng an soih aih đăp mpăn trong rse điện gay mât njrăng săk jăn bah rnăk wâl nơm".

Tĭng wa Thào Seo Lử, Kruanh thôn 7, xã Cư San, gŭ ta nkual jru ngai đah nklang nkuâl rlău 50km, dơi dŏng trong rse điện ngih dak lah nău rhơn dŭt têh bah kônh wa. Yor kơt nê̆, nău mât đăp mpăn an trong rse điện hăn rlău lah nău dơn kan bah nuĭh ƀon lan đŏng.

“Ntơm bah năm 2007 dơi têk điện ntrŭp trạm sĭt ta aơ lah ƀon lan mpôl hên dŭt rhơn nđơr, dŭt lah uĕh Đảng, Ngih dak n'hanh mpeh điện lực. Nău rêh wăng sa bah  mpôl hên ta aơ lơn âk tăm tơm keo. Tâm khay mih phŭt ri mpôl hên tâm nkah way mbro đah kônh wa mô dơi thơ tha lah tơm si păng chôt tâm trong rse điện khuch tât săk khĭt rêh kon nuĭh bah ƀon lan”.

Lam xã Cư San geh 4800 rnăk, lĕ rngôch lah nuĭh Mông n'hanh Dao tă bah ăp n'gor mpeh Bắc lăp gŭ rêh. Wa Phạm Đăng Đảng, Kruanh UBND xã Cư San an gĭt, neh ntu hvi yơn yôk nor kro ntang jêng wăng sa bah bri lah tơm geh khlay, tâm di đah trong kan tuch tăm bah ƀon lan rnoi mpôl đê̆. Tăm tơm keo mô roh mông nar mât chăm, dơn roh prăk rvăt ntil bôk năp dơm. Lôch 4-5 năm, rĭng ăp ha keo an nsĭt nău geh 60 tât 80 rkeh prăk. Yor kơt nê̆, rnôk tăm keo, kônh wa way ndăn ăp rnoh neh, mô dơn nê geh nuĭh ntêr tăm ta neh rong an soih aih trong rse điện cao áp đŏng.

“Tâm bah ri aơ nơh ri n'gâng kan điện đah n'gâng kan ta ntŭk hŏ tâm rgop kan nsum dŭt uĕh tâm nkoch trêng rgŏ jă kônh wa, yơn lah hôm du đêt nkual mô hŏ tĭng ƀư jăp lĕ tĭng di trong dăp rgum bah n'gâng kan điện đŏng. Yor lah ƀư kơt nê̆ ri neh tăm bah kônh wa geh đă rong an dŭt âk. Ri n'gâng kan ta ntŭk ndrel đah n'gâng kan điện nkoch trêng rgŏ jă tay kônh wa gay mhâm ƀư đăp mpăn tâm ban geh wăng sa bah nuĭh ƀon lan n'hanh đăp mpăn lam trong rse điện”.

Wa Nguyễn Công Hướng, Groi Giám đốc Điện lực Ea Kar, an gĭt, tĭng quy định, nuĭh ƀon lan dơi an tăm ƀah đah trong rse điện trung áp dŭt đêt 3m. Yơn lah, tăm bah tơm keo lai prêh rlău 15m, geh ma nău ntŭn chôt tâm trong rse điện, jêng ân tăm ƀah đah trong rse điện 20m mơ đăp mpăn. Aƀaơ điện lực Ea Kar dôl mât dŏng rlău 750 km trong rse điện trung áp njok lam 2 nkuâl Ea Kar n'hanh nkuâl M’Drăk, lơn âk hăn rlău ăp nkual yôk prêh geh bri tăm. Tâm khay mih phŭt, geh ma nău tât khuch trong rse điện tă bah tơm si ntŭn pă tâm trong rse dĭl.

Nar 11/9 mhe aơ, tă khuch bah phŭt mbrô 5, mih têh sial dăng hŏ lơh pĭch rlâm neh, tơm si chôt ntŭn pă trong rse điện 22KV mpeh njăr trong rse 471F18 đah Ea Kar n'hanh M’Drắk, lơh roh điện 11.600 rnăk. Ăp ntŭk tât khuch geh ta yôk nor sop nkăp, jêr jŏt an pah kan hăn nkra bah. Yor kơt nê̆, đăp mpăn an trong rse điện tâm khay mih, n'gâng kan điện dŭt ŭch geh nău tâm rgop kan nsum bah nuĭh ƀon lan.

“Đah nău mha êng trong rse điện jong rlău ăp nkual bri tăm lah jêr jŏt dŭt âk bah mpôl hên tâm pah kan mât dŏng trong rse điện. Ri tâm let năp tay Điện lực Ea Kar geh tay ăp trong nkra ndrel hăn, kơt tâm rgop kan nsum tay đah n'gâng kan ta ntŭk nkoch trêng gay kônh wa gĭt wât n'hanh tâm ban ŭch đah n'gâng kan điện, tâm boh kan nsum uĕh lơn đŏng ndrel đah n'gâng kan điện gay đăp mpăn soih aih trong rse điện tâm ban  kơt tâm nău dŏng điện đăp mpăn, lơn lah tâm khay mih phŭt sial lơh”.

  Tơm điện geh nkô̆ khlay rhŏ dŏng an hun hao wăng sa rêh jêng kon nuĭh. Yor kơt nê̆, nuĭh ƀon lan ân tĭng di quy định đăp mpăn trong rse điện, mô dơn lah mât njrăng săk khĭt rêh bah săk nơm n'hanh rnăk wâl, ma hôm rgop mât tơm điện geh dŏng mbro an nău rêh n'hanh nău kan./.

Nuĭh rblang: Điểu Thân