VOV4.M’nông: Rnôk bah năp, ăp n’gor Tây Nguyên lĕ wăch rgum geh âk nău nchrăp ƀư điện sial, đah rnoh ntuh kơl âk rbăn rmen tât âk rbăn rmen prăk, lĕ rgop kơl GRDP ăp n’gor dơi mât hao jêng âk. Ăp nău nchrăp nkre rgâl sial jêng điện an jâng wăng sa neh dak nkre nsĭt tay âk rhiăng rbăn rmen prăk an tơm prăk n’gor. Ndrĭ yơn, ăp nău nchrăp ƀư geh âk nău yô̆ an n’ăp nuĭh ntuh kơl, nuĭh ƀon lan n’hanh n’gâng kan ăp gưl. Ăp n’gâng điện sial dôl dơi ndăn ƀư geh âk nău tih.

          Nkuăl Dak Song, n’gor Dak Nông lah ntŭk ntoh lư ta Tây Nguyên mpeh hun hao điện sial, đah 6 nău nchrăp ƀư, dĭng lĕ dăng 430MW, dĭng lĕ rnoh prăk ntuh kơl rlău 15.000 rmen prăk. Yơn ntŭk aơ dôl geh âk ntŭk duh jêr đah rnă njrăng đăp mpăn, đah ăp nău tâm pit đă trok neh ƀa ƀơ jêr jŏt. Nuĭh ƀon lan na nao rgum âk nuĭh n’hanh geh âk nău ƀư nking n’gang nău ndâk ƀư. Tâm rnoh âk nuĭh râng tâm pit, nô Dương Văn Chương (rnoi Dao), ta ƀon Dak Nthôt, xă Thuận Hà ndơ̆ nkô̆ nău djiăt tĭng brah:

“Gâp rdâk 4 n’gâng rla nĕ gay mât njrăng chor jay, yor tĭng brah, nău way ơm bah rnoi mpôl hên lah mô dơi ndơ̆ ăp ndơ loih hăn rlău chor jay ma tâm jay geh ntŭk ƀư brah u che. Lah đah điện sial ŭch rơih n’gâng aơ ri an tâm nchră, gay gâp đă n’hum, gay mbơh đah u che n’hanh ƀư brah”.

Du ntŭk ƀư điện sial dôl dơi rdâk ƀư ta Gia Lai.

          Tĭng ăp nuĭh ntuh kơl điện sial ta Dak Song, ndrel đah nking n’gang kan ndeh, nking n’gang ndâk ƀư gay đă “trok-ntop kơl”, nuĭh ƀon lan hôm e ndâk ƀư bơi rhiăng mlâm jay tâm nkual doanh nghiệp dôl tâm nchră gay đă tay ăp rnoh trok tâm di lơn. Wa Nguyễn Văn Tuấn, Kruanh Cty TNHH Du ntŭk kan ŭnh điện Dak Ndrung an gĭt, nu nău ƀư bah doanh nghiệp aƀaơ lah dŭt jêr jŏt:

          “Geh âk trong rse điện, lĕ dơi tâm nchră trok jêh, yơn nar bah kơi nuĭh ƀon lan hao hŭch đah nău ŭch ndra ƀư jêr an doanh nghiệp, tâm rnôk nĕ rnoh ntop kơl lĕ dơi tâm ban ŭch đah n’gâng kan ƀon lan, doanh nghiệp n’hanh ntŭk kan nchoăt rdêng”.

          Bah 3 khay năm aơ, ntŭk mbơh nkoch nău mhe lĕ ndơ̆ âk mpeh ăp nău jêr jŏt pháp lý yor ăp nău nchrăp ƀư dơi ndâk ƀư rnôk mô hŏ rgâl nău ŭch dŏng neh, dŏng âk nuĭh pah kan dak bah dih mô tâm di, hôm n’gâng kan ta ntŭk kơt gŭ bah dih. Ta Gia Lai, ntŭk geh 16 nău nchrăp ƀư dơi mbơh, kruanh n’gâng kan công thương n’gor rblang: aơ lah ăp nău nchrăp ƀư gưl ngoăy, yor N’gâng kan Công thương mât uănh, nuĭh ntuh kơl knŭng nău mbơh an n’gâng kan ta ntŭk. Jêh bah nău aơ nuĭh ntuh kơl điện sial kơt mô dơi uănh nđôi, rwăt êng neh, tâm ton trok neh. Wa Phạm Văn Binh, Kruanh N’gâng kan Công thương Gia Lai an gĭt, dŭt âk doanh nghiệp trok tĭng rnoh ntrŭnh nsum, yơn mô đêt ntŭk dơi trok mô di rnoh nsum, jêng geh nău mô uĕh an ƀon lan:  

          “Kơt gâp pah kan đah UBND nkuăl Chư Pưh, ri nkuăl lah ăp doanh nghiệp điện sial dôl trok an ngăch, an dơi geh nău ŭch. Ndrĭ yơn aƀaơ dơi mkra nău aơ jêh nĕ ôi taơ klak, ăp ndơ ƀư bah nkuăl, lơn lah ăp ndơ ƀư ta nkual jêr jŏt, ma tĭng rnoh trok bah doanh nghiệp, ri mpôl hên dŭt jêr jŏt tâm rnôk trok sŏk neh”.

Ta ntŭk ƀư điện sial nuĭh ƀon lan  Đê Kjiêng ndrel cán bộ bri ngih dak uănh nđôi mât njrăng bri.

          Nău roh đăp mpăn đah rnă njrăng ta ăp nkual ndâk ƀư điện sial dôl lah nău rvê ngăn. Nuĭh ƀon lan mô rlu n’hao trong trok, hôm doanh nghiệp lĕ rgŏ jă ăp nuĭh dơi kuăl lah “oh nô kon nuĭh” gay mkra nău tâm pit. Ăp rmôt nuĭh aơ ntop kơl doanh nghiệp đah trong ƀư jêr, đê̆ đŏng lơh nuĭh ƀon lan. Ta nkuăl Dak Song, n’gor Dak Nông lĕ geh âk nău tâm lơh sôt săk; hôm ta nkual ƀon têh Pleiku, n’gor Gia Lai, geh mô đêt nău phong bah nuĭh ƀon lan mpeh nău he geh ntêt nri, đê̆ đŏng nhrach dak si hăng rnôk luh bah dih jay. Tĭng wa Lê Trọng Yên, Groi Kruanh UBND n’gor Dak Nông, n’gor lĕ nsrôih lăp gay dôh rklaih du đêt nău tâm pit. Yơn lah ăp nuĭh ntuh kơl hôm e mkra mô uĕh tay, n’gâng kan ƀon lan ta ntŭk nkân ri tâm lơh mbra hôm e jŏ jong:  

           “Nuĭh tơm ntuh kơl ndơ lơh mô lăp gay tâm nchră du ntil nău, gay lah kloh, gay bu diăt tĭng. Ƀon lan ri ăp đồng chí knŭng lah, lah dơm. Yơn bônh jă, rgŏ jă ri ăp đồng chí knŭng gŭ bah dih. Tâm trong chính trị ma ƀư kơt nĕ ri m’hâm dơi ƀư”.

9 khay bah năp, bôl lĕ rngôch ăp ntil wăng sa mâp jêr jŏt yor srê Covid-19, yơn sŏk ndơ̆ tơm prăk ta ăp n’gor Gia Lai, Dak Lak, Dak Nông hôm e rlău trong nchrăp. Đah 28 nău nchrăp ƀư, dĭng lĕ dăng bơi 2.300 MW, tơm prăk 3 n’gor sŏk geh rlău 1 rbăn 100 rmen prăk. Lah ăp nău nchrăp ƀư ngăch ndơ̆ an dŏng pơk điện, ăp nău nchrăp ƀư mbra rgop an ăp n’gor hang rhiăng rmen prăk soay ăp năm. Ndrĭ yơn lơ ndal, ndăn ngăch ri ăp nău nchrăp ƀư lơ mbrơi. Kơt nău nchrăp ƀư Dak Ndrung 1, 2, 3, ta nkuăl Dak Song, n’gor Dak Nông, rlău 70% rnoh n’gâng tourbin mô hŏ dơi ƀư yor wăk kol trok, sŏk neh. Ta Gia Lai, ăp nău nchrăp ƀư điện sial geh nău uĕh lơn, yơn nău ndâk ƀư trong rse gay nglăp trong điện ngih dak, mâp âk ntŭl rlong tay. Ăp n’gor Tây Nguyên dôl nsrôih kơl nuĭh ntuh kơl doh rklaih, ntrôl ngăch ăp nău nchrăp ƀư. Ndrĭ yơn ăp nău bônh đă nuĭh ƀon lan kơl an mbra geh săk rnglăy rnôk doanh nghiệp điện sial hăn lor tĭng pháp luật n’hanh tâm rgop uĕh đah n’gâng kan ƀon lan ta ntŭk./.

          Nuĭh rblang: Y Sưng Phê Ja