VOV4.M'nông: Tâm 9 khay rlău aơ, rĭng ăp khay geh rlău 10 rbăn doanh nghiệp rhuăt luh bah ntŭk tăch rgâl, tâm rnôk rnoh doanh nghiệp njêng mhe n'hanh rnoh tơm prăk đăng ký ntuh kơl hŭch rđĭl đah ndrel khay dja năm e nơh. Ta năp ăp jêr jŏt bah doanh nghiệp, Thủ tướng Chính phủ hŏ geh nău mĭn rđău đă kloh rvah lah rêh nsum đăp mpăn đah Covid-19 gay hun hao wăng sa.

Tĭng Tổng cục Thống kê, tă khuch bah nuh srê Covid-19, rêng pă an tơm ndơ geh pă gâl, 9 khay aơ geh rlău 90 rbăn doanh nghiệp nchrai kan, hao 15,3% ndrel khay dja năm e nơh (rĭng ăp khay geh rlău 10 rbăn doanh nghiệp luh du bah ntŭk tăch rgâl). Tâm 9 khay aơ, dơn geh nklăp 85 rbăn doanh nghiệp njêng mhe dơm, hŭch 13,6% rđĭl đah ndrel khay dja năm e nơh. Ndrel đah nê, rnoh âk tơm prăk đăng ký ntuh kơl hŭch rđĭl đah ndrel khay dja năm e nơh. Wa Phạm Đình Thuý – Vụ trưởng Vụ Thống kê Công nghiệp n'hanh rdâk njêng, Tổng cục Thống kê, Bộ Kế hoạch n'hanh Đầu tư an lah:

“Covid ntoh bah bôk năm 2020, tât aƀaơ hŏ bơi 2 năm. Suan ât rdâng bah doanh nghiệp hŏ kroh suăt. Mô hŏ geh năm ma geh rnoh nchih rgum đêt".  

Wa Nguyễn Quang Huân – Đại biểu Quốc hội khoá 15, Groi kruanh Hội Doanh nhân tư nhân Việt Nam ri an gĭt:

         “Mhe aơ nơh ân gŭ srang ngai êng jŏ jong ta âk n'gor, lơn lah ta nkual ƀon têh Hồ Chí Minh, Hà Nội, ăp n'gor geh nkual nuh srê rnoh doanh nghiệp ân rhuăt luh bah ntŭk tăch rgâl lah nău he dơi gĭt n'hanh ân pha lah dơm yor ndrel du rnôk ân geh tât 2 rnoh kan nkre đah ƀư njêng tăch rgâl nkre đah rdâng lơh nuh srê lah dŭt jêr jŏt, jêng he ân rong lor ăp ntil ndơ he ân dơi ƀư lor. Dŭt lap, tât aƀaơ, Thủ tướng hŏ geh nău mĭn rđău đă kloh rvah lah rêh nsum đăp mpăn đah Covid gay hun hao wăng sa, gâp mĭn nô nău mbra dơi rgâl uĕh tâm ăp khay kêng dŭt năm".

          Ndrel uănh khlay trong nkra gay doanh nghiệp hŏ n'hanh dôl hôm gŭ tay mbra dơi mât rnoh ƀư njêng tăch rgâl; moh trong nkra gay ăp doanh nghiệp dôl đăp mpăn ƀư njêng tăch rgâl mbra ơm dơi đăt ndal tâm rơh tât...wa Phí Thị Hương Nga – Groi  Vụ trưởng Vụ Thống kê Công nghiệp n'hanh rdâk njêng, Tổng cục Thống kê, Bộ Kế hoạch n'hanh Đầu tư njrăng đă:

          “Bol ma ăp doanh nghiệp hŏ dŭt nsrôih, yơn tă bah nuh srê Covid-19 geh jong ƀư suan ât rdâng bah doanh nghiệp hŭch âk. Rnoh âk doanh nghiệp rlu kan 9 khay bôk năm lơn âk lah doanh nghiệp geh rnoh têh ta nâm 5 rmen prăk. Nău ntop kơl hŭch prăk dŏng bôk năp tâm ăp doanh nghiệp lah dŭt n'hâm khlay, ntĭt kơt an doanh nghiệp uănh năl êng Covid n'hanh ndơ̆ luh ăp trong nchrăp ƀư njêng tăch rgâl tâm di, hôm đăp mpăn ăp quy định mpeh njrăng n'gang Covid-19 n'hanh ăp n'gor ân ntlơi jăng ăp si ƀŭt kon ƀư jêr an doanh nghiệp".

N'glôch jêh rơh hop Chính phủ way ăp khay khay 9 mhe aơ, Thủ tướng Phạm Minh Chính lah rjăp du đêt nkô̆ khlay, tâm nê êng uănh khlay tât nău kan bah doanh nghiệp. Na nê̆ lah an ƀư ăp trong nkra dâk hao tay nău kan ta ăp nkual công nghiệp, nkual wăng sa, nkual công nghệ mhe, nkual nkret njêng ndăng. Droh rklai ăp jêr jŏt kơl doanh nghiệp mât si ƀŭt ton rvăt ndơ, mât rêng rnoh khlay pă an tơm ndơ ƀư, nsrôih ƀư njêng an ăp khay âk nuĭh dŏng, lơn lah ăp băl tâm boh tăch rgâl têh ta châu Âu, Hoa Kỳ, Đông Bắc Á. Leo ƀư mât dŏng, ndăn trong dơh soih bah ăp hiệp định dah rŏng tăch rgâl hŏ ký ton. Kơp nđăp, nchroh âk bưm ŭch geh dŏng ndơ kêng dŭt năm mô  an pah pât ndơ tăch./.

          Nuĭh rblang: Điểu Thân