VOV4.M’nông – Ôi 7/9, ta Hà Nội, N’gâng kan tuch tăm mât rong n’hanh hun hao ƀon lan rƀŭn pơk sŏng dăng đah ăp ntŭk n’hanh Hiệp hội nău kan ndoh ndơ tâm nchră trong dôh rklaih geh nău ŭch tăch n’gluh ndơ si glê năm aơ. Rơh ntoh srê Covid-19 rơh tal 4 lĕ n’hanh dôl khuch hô tât nău ƀư nkra njêng, ê ƀư bah ăp doanh nghiệp nău kan si, lơn lah ta nkual mpeh bah dâng, ntŭk rgum rlău 70% dĭng lĕ doanh nghiệp, đah rnoh khlay tăch n’gluh geh bơi 80% dĭng lĕ geh prăk tăch n’gluh si n’hanh ndơ si bah lam dak. Kơp êng lĕ geh rlău n’gul rnoh doanh nghiệp an manh rlu mô lah ntĭt mpông n’hanh n’hŭch ngăch geh nkra njêng ndoh ndơ. Gay dôh rklaih jêr jŏt an doanh nghiệp, mpeh N’gâng kan tuch tăm mât rong n’hanh hun hao ƀon lan lĕ dăn đă Chính phủ n’hanh Ban ntĭm rđău Ngih dak njrăng n’gang srê Covid-19 kơl lor tâm păng vaccine njrăng n’gang covid-19 an ăp ntŭk doanh nghiệp nău ƀư êng. Nkre ntop kơl n’hanh ntĭm dak si gay ăp doanh nghiệp nchrăp rwăt n’hanh ƀư êng uănh năl ngăch n’hanh uănh năl tĭng trong ƀư PCR kơl n’hŭch prăk; an ăp doanh nghiệp nchrăp joi tơm vaccine gay chuh an nuĭh ƀon lan.

Nŭih rblang: Y Sưng Phê Ja