VOV4.M’nông: Khay druh ndăm năm aơ, rmôt druh ndăm Công ty điện lực Dak Lak hŏ ƀư âk nau kan yor nau rêh ƀon lan, kơt nau nkra điện trong ƀon, pă nklâm prăk kơl kon se hăn nti ân kon se ach o nti blau. Ăp nau kan ueh yor nau rêh nar lơn ma geh râng, ndơn geh nau nsum ty kơl an bah druh ndăm ăp ntŭk, ăp nkuăl bah n’gor Dak Lak.

            Di rơh nkah nar ndâk Đoàn ndruh ndăm Cộng sản Hồ Chí Minh lơ 26/3 mhe rlau, âk rhiăng kon se nti bah Ngih săm ƀŭt Tiểu học Nguyễn Đức Cảnh, xã Ea Ktur, nkuăl Cư Kuin, hŏ râng bôk nau kan nkoch mbơh nau nâp ueh bah điện ndrel kơl n’hâm choat jâng yor đoàn druh ndăm bah công ty điện lực Dak Lak ƀư. Ta aơ, rmôt hŏ pă 20 nklâm ndơ, rnoh 10 rkeh ân kon se ach o nti blau.

Ngăn lah rmôt kan hôm pă du nklâm prăk rnoh 25,2 rkeh ân oh H’Mrin Byă, rnoi rđe, nti jrâu 2, geh nau rêh jêr, me khĭt ơm. Nklâm prăk aơ kơl an hăn nti ân tât lôch jrâu 9. Ndơn prăk aơ, oh H’Mrin Byă, ngơi:

             ‘Ăp kônh, yơ tât pă ân gâp prăk ri gâp rhơn ngăn. Gâp mra nsôih hăn nti ân blau, ân jêh aơ jêng nai dak si”.

            Nkoch tât bôk nau kan aơ, nai nti Nguyễn Thị Phương, Hiệu trưởng ngih săm ƀŭt Nguyễn Đức Cảnh, xã Ea Ktur, nkuăl Cư Kuin, ngơi:

 ‘Gâp saơ nau pă prăk ân kon se ach o nti blau lah nau kan ueh khlay, mô knŭng kơl an ăp oh bah oi nau jêr, ma hôm rgop nau pơk nau ueh nau ntĭm nti tâm ngih săm ƀŭt, kơl an ăp oh blau ŭch ma băl nti nơm, blau rŏnbg kon nŭih, êng nê hôm geh trêng lơn ăp nŭih geh nau blau tâm nau ntĭm nti ndrel ma tâm nau rêh đŏng”.

            Nô Hoàng Xuân Tứ, Groi Bí thư Đoàn bah Công ty điện lực Dak Lak, mbơh aơ lah rơh bôk năp rmôt kan pă prăk “kơl n’hâm trong ngai” đah nau ŭch kơl an kon se ach o geh nau dơi hăn nti:

  “Đoàn druh ndăm công ty tâm ăp năm rlau aơ geh âk bôk nau kan rgop kơl an ân kon se ach o nti blau, kơt lah pă nklâm ndơ, pă prăk, pă ndeh vah jâng…Tât rnôk aơ ri đah nau rƀŏng nau kan đoàn tâm rơh mhe ri phung hên hŏ rƀŏng trong mhe ân nau kan kơl an tâm nau rêh, nê lah ntrơn bah ăp nau kan pă prăk rnôk nê jêng nau pă nklâm prăk kơl an trong ngai. Phung hên ŭch mra geh nau rêng âk lơn tay đah rmôt cán bộ nŭih pah kan bah công ty ndrel ăp ntŭk, ăp nŭih geh nuih n’hâm lŏng kŏ nsum ty kơl an tâm nau kan ueh, ăp bôk nau kan ngăn kơt aơ”.

            Ndrel ma nau pă nklâm prăk ân kon se ach o, kŏ tâm khay druh ndăm mhe rlau, đoàn druh ndăm điện lực Dak Lak hŏ ƀư 2 nau kan “mpoh ang trong ƀon” tâm nkuăl căn cứ cách mạng ƀon Pa, xã Cư Prao, nkuăl M’drak ndrel thôn 1 xã Yang Reh, nkuăl Krông Bông. 2 ntŭk kan aơ geh hvi 3,2m, rnoh rlau 60 rkeh ndrel ƀư đah druh ndăm ntŭk kan điện hôm geh nau rgop n’hâm mpeh tơm prăk ndrel n’hâm kơl bah ăp rmôt druh ndăm tâm nkuăl.

            Tĭng wa Trần Doãn Tới, Groi Bí thư Đoàn n’gor Dak Lak, ăp nau kan kơl an bah mom ndăm ntŭk kan điện tâm ăp năm rlau aơ pơk nau rêng ân druh ndăm ăp nkuăl bah n’gor. Nar lơn geh âk nau kan “mpoh ang trong ƀon” “mpoh ang nau rnơm” leo tât nau ueh ân ăp ƀon lan tâm nkuăl jru, ngai:

             ‘Đah nau nsum ty kơl an bah Công ty điện lực Dak Lak mpeh drăp ndơ kŏ kơt lah nŭih hăn kơl an, ndrel ma nê lah bah mrôt druh ndăm tâm lam n’gor, hŏ rgop nau pơk njêng nau rnơm tâm ƀon lan đah rơh mom. Tâm rơh rlau aơ ri njêng du nau kan ueh, du nau kan dăng ngăn tâm đoàn viên druh ndăm, nsum ty ndâk njêng ƀon lan mhe”./.

                                    Nŭih rblang: H’Thi