Nău nchih 2: Trong dŏng vaccine- nsing nơm nău dơi
VOV4.M'nông: Rlău 6 khay rdâng lơh nuh srê dŭt rgŭt n'gĭng, tâm rnglăp lah suan dăng nơm gay lam dak tĭng kơn rlău chông nuh srê Covid-19 tâl 4. Ndrel đah tâm rnglăp lah ăp trong kan nâp jong khlay hŏ dơi Đảng, Quốc hội, Chính phủ ndơ̆ luh du trong ngăch ngăr, năn ngăch, bên di đah ăp nău tât bah tĭng rơh nuh srê. N'hanh rloh rlău du njăr trong rgŭt n'gĭng rdâng lơh nuh srê, trong dŏng vaccine jŏ jong nkre đah nău nsrôih mô gŭ rlu tâm boh vaccine, tâm boh ndơ̆ rgâl công nghệ gay ƀư njêng êng vaccine dơi uănh lah trong nkra- nău nsing nơm gay Việt Nam lơh dơi, tĭng kơn mât kân bah nuh srê, ndơ̆ nău rêh plơ̆ tay kơt ơm.
Êng đah ăp rơh nuh srê bah năp nơh, rơh ntoh nuh srê Covid-19 tâl puăn hŏ dŭt krit nji lơn rnôk kaman njêng săk Delta ntưp rêng dŭt ngăch. Ntơm bah bar pe hê ntưp kêng dŭt khay 4, hŏ ngăch ntưp rêng jêng bar pe rhiăng nuĭh lôch du pơh, đah tơm nuh srê bôk năp lah 2 n'gor Bắc Giang n'hanh Bắc Ninh. Ntơm bah bar pe jât nuĭh ntưp ta nkual ƀon têh Hồ Chí Minh hŏ rêng ngăch jêng hang rhiăng nuĭh bar pe nar bah kơi nê. Tât bôk khay 7, rnoh nuĭh ntưp Covid 19 hŏ rlău bar pe rbăn nuĭh n'hanh hŏ âk rlău bar tơ̆ tâm 1 pơh, hao ndal tât rlău jât rbăn nuĭh, ta rnoh rlău 10.000 nuĭh ntưp mhe tâm kêng dŭt khlay 7 n'hanh chông yôch tâm ăp nar kêng dŭt khay 8, 9, rnoh nuĭh ntưp geh nar tât rlău 17 rbăn nuĭh. Bar bôk tơm wăng sa bah neh dak lah Hà Nội n'hanh nkual ƀon têh Hồ Chí Minh, hôm ăp n'gor công nghiệp Bình Dương, Đồng Nai... ân ntĭl mpông ăp ntŭk ƀư njêng tăch rgâl, an gŭ srang ngai êng lam rêh jêng kon nuĭh da dê. Rnôk dja, pah kan njrăng n'gang nuh srê bah Việt Nam hŏ tĭng ƀư đah nău way: 5K + vaccine, dak si săm + công nghệ + nău gĭt êng nuĭh ƀon lan ndrel ăp n'gâng tơm: Uănh năl mham, an gŭ rgum êng, săm ji; nkre tâm rgop jôn rbăn nkre đah njrăng n'gang n'hanh rdôl lơh. Tâm nê vaccine dơi uănh lah trong nkra dŭt geh nău tam tâm njrăng, n'gang nuh srê COVID-19. Đah nău ŭch tât geh n'hâm suan ngăch dăng, săk suan bah ƀon lan khlay lor bôk năp, Chính phủ hŏ nsrôih lĕ n'hâm suan an trong kan vaccine.
Ntơm bah 3 khay bah năp aơ nơh, lor bôk năp, trong kan chuh vaccine Covid-19 ndăn ngăch đah rnoh dŭt âk tâm chuh n'gang ta Việt Nam dơi rgŏ jă ngăn, đah nău ŭch chuh geh tât an nklăp 75 rkeh nuĭh, đah 150 rkeh n'glai chuh tâm n'gul kêng dŭt năm 2021 n'hanh bôk năm 2022. Du khay bah năp nơh, Prăk nkrem vaccine njrăng n'gang Covid-19 hŏ dơi njêng gay wơt dơn, mât dŏng ăp tơm ndơ kơl, rgop êng ma prăk, vaccine bah ăp mpôl, ăp nuĭh tâm dak n'hanh bah dih dak; nău kan rvăt, n'glăp, gŭ mĭn, ƀư njêng vaccine tâm dak. Ta rơh ntoh măt prăk nkrem, nuĭh mât bôk kan Chính phủ - Thủ tướng Phạm Minh Chính rhơn rngot lah:
Neh dak he hôm jêr jŏt, Đảng n'hanh Ngih dak hŏ n'hanh dôl nsrôih yơn ân geh nău nsum ti rgop suan ma nuih n'hâm bah lĕ nsum mpôl, lam rêh jêng kon nuĭh. Nar aơ ntơh măt Đảng, Ngih dak, Mặt trận Tổ quốc Việt Nam, gâp kuăl jă lĕ rngôch ƀon lan du nuih n'hâm rdâng lơh nuh srê. Ăp ndơ rgop geh nkô̆ khlay an nău đăp mpăn lơn an săk nơm, rnăk wâl nơm, an nsum mpôl n'hanh lam nău rêh jêng kon nuĭh. Aơ lah prăk nkrem bah nău rŏng nuĭh, bah nuih n'hâm tâm rnglăp, bah nău nsing nơm, bah play nuih buăt nthoi play nuih gay he ndrel rlău dơi jêr jŏt, rgop ƀư jêng du Việt Nam lơh dơi.
Rnôk rgŏ jă chuh n'gang vaccine, Việt Nam mhe geh bơi 4 rkeh dĭng vaccine bah tơm ndơ kơl bah Liên minh Covax n'hanh tơm ndơ rvăt gay chuh an mpôl pah kan bôk trong rlong sial rdâng lơh nuh srê. Ntrŏng, ma ăp trong ƀư ân nkrum lam dơi vaccine chuh an nuĭh ƀon lan gay ƀư ntŭk nsing ndơ̆ nău rêh plơ̆ tay kơt ơm mhe, dơi geh nău tâm ban ŭch bah Bộ Chính trị, Ban Bí thư, Thủ tướng hŏ njêng rmôt pah kan bah Chính phủ mpeh tâm boh vaccine tă bah Bộ trưởng Bộ Ngoại giao Bùi Thanh Sơn ƀư Kruanh rmôt. Ăp kruanh rđău kan Đảng, Ngih dak mô kơp măng nar, geh mbro ăp rơh mâp, kuăl điện tâm nchră đah kruanh rđău kan ăp dak, ăp tập đoàn dược phẩm, ndăn lĕ rngôch ăp trong ƀư gay tât geh tơm ndơ pă an. Kruanh dak Nguyễn Xuân Phúc tâm rnôk hăn khâl ngăn Cuba n'hanh râng Rơh tâm nchră rgum lam lĕ rngôch gưl têh bah Đại hội đồng Liên hợp quốc khóa 76 ta Hoa Kỳ hŏ geh âk nău kan gay joi tơm vaccine an Việt Nam tâm năm aơ n'hanh ăp năm bah kơi tay. Kruanh rđău kan ăp n'gâng kan, ăp n'gor, ăp doanh nghiệp, nhih pah kan tâm boh dak bah dih tâm ban kơt nê đŏng. Tâm rlong đah mông nar, nsrôih mô gŭ rlu gay nsĭt tay nău dơi geh ngăn ngăn nê lah vaccine sĭt Việt Nam nar lơn ma âk. Kơp tât bôk khay 10 dja, tâm boh vaccine hŏ nsĭt an neh dak rlău 60 rkeh dĭng vaccine. Nchrăp tât bôk khay 11, Việt Nam mbra dơn geh bơi rlău 40 rkeh dĭng bah ăp tơm tâm boh dak bah dih n'hanh rvăt n'glăp. Bộ trưởng Bộ Ngoại giao Bùi Thanh Sơn lah rjăp:
Bôk năp, lah rjăp tay trong nchrăp mô rgâl n'hanh rloh rlău bah Đảng n'hanh Ngih dak he lah mât njrăng n'hâm suan ƀon lan khlay lor bôk năp, rgum lĕ tơm ndơ tâm dak n'hanh dak bah dih, tâm nê geh vaccine, ndơ̆ nău kan wăng sa- rêh jêng kon nuĭh n'hanh nău rêh bah nuĭh ƀon lan plơ̆ tay kơt ơm. Tâl bar, lah rjăp nău nsrôih dŭt âk n'hanh nău kan lĕ n'hâm suan bah Chính phủ tâm trong kan vaccine gay pơk hvi tay chuh n'gang an lam ƀon lan. Ân ntrôl dăng tâm boh vaccine gay tât geh an dŭt ngăch, ndơ̆ vaccine, ndơ năp dŏng kan dak si n'hnanh dak si săm Covid-19 sĭt dak dŭt âk n'hanh dŭt ơm.
Đah trong rƀŏng "mô geh nuĭh ntlơi êng bah kơi tâm nuh srê, mô geh du hê nuĭh an gŭ êng bah dih nău tât đah vaccine", tât bôk khay 10, lam dak hŏ geh rlău 50 rkeh nuĭh dơi chuh n'glai 1; 14 rkeh nuĭh dơi chuh tŏng 2 n'glai vaccine. Du đêt n'gor nkual tơm nuh srê hŏ nkrum lam bơi 80% tât 95% rnoh nuĭh ƀon lan dơi chuh vaccine n'glai 1. Ntơm bah nuih n'hâm mpŏng kâp, an tât nău rhơn n'hanh lĕ ma nău nsing nơm tâm vaccine hŏ mpơl kloh ăp n'glai chuh vaccine njrăng n'gang khlay:
- Rêng chuh dơi ăp bác sĩ but săm sơch na nê̆, mbơh nti an mpôl hên mbra geh moh ndơ tâm rdil đah dak si lôch chuh;
- Năl lah ngăn vaccine păng ƀư an he njêng geh du săk dăng chŏl, bah ntưp. Lah Covid-19 geh ntưp tât ntŭk he gŭ rêh ri he mô ir geh nău rvê ơm yor he mpŏng lah săk he dăng chŏl đah nuh srê.
Nê lah ăp nău rhơn bah nuĭh ƀon lan rnôk dơi chuh vaccine covid 19 ma mpôl hên nchih nkah tay. Rlău 90 nar mbrôn lĕ n'hâm suan rdâng lơh nuh srê đah hang rmưn nuĭh kan dak si nar măng "bĭch, sa" ndrel đah vaccine gay chuh n'gang an nuĭh ƀon lan, tât rnôk dja, nău tam bah ăp n'glai chuh hŏ mbra dơi uănh saơ kloh rnôk rnoh nuĭh khĭt rĭng nklăp 300 nuĭh/nar ta nklang tơm nuh srê nkual ƀon têh Hồ Chí Minh ntơm nơh, aƀaơ hŏ hŭch ta rnoh bar pe jât nuĭh dơm. Rnoh nuĭh ntưp rĭng geh lam dak ntơm bah 10 rbăn nuĭh/nar jŭr hôm rlău 4 rbăn nuĭh/nar. Rnoh nuĭh ji jru hŭch nklăp 40% đŏng. Nchrăp geh bơi 20 rbăn y bác sỹ miền Bắc hăn kơl an nklang tơm nuh srê nkual ƀon têh Hồ Chí Minh n'hanh du đêt n'gor mpeh bah dâng dơi plơ̆ sĭt jay, ndjôt nkre nău rhơn tĭng kơn ntrôl rŭch dơi nuh srê.
Lơh dơi nuh srê lah nău dơi bah nuĭh ƀon lan. Ma trong nchrăp, trong rdâng lơh nuh srê ngăch ngăr, tâm di đah tĭng rơh, tâm nê geh nău ntrŏng trong kan nkrum lam vaccine ma trong ƀư nâp jong vaccine lah n'gâng tơm, rgum khlay, Việt Nam hŏ geh nău nsing nơm gay lơh dơi, kơt nău lah bah Thủ tướng Phạm Minh Chính tâm du rơh rgum nchră mhe aơ:
He geh nău nsing nơm ntrôl rŭch nuh srê nsĭt tay nău đăp mpăn an n'hâm suan ƀon lan n'hanh hun hao neh dak têh ndrŏng. Nău nsing nơm nê tă bah nău kan bah ăp nuĭh he, nău nsing nơm nê lah bah ăp nuĭh he n'hanh nău nsing nơm nê bah neh dak he, bah nău way ơm kuăl e dăng janh bah rnoi nuĭh he. He nsing nơm lah, lôch rơh rdâng lơh dja, he têh dăng lơn, jêng săk kranh lơn, nâp dăng lơn gay rdâk njêng neh dak dăng janh, nâp dăng, yor ma nău ŭch ƀon lan geh ndrŏng neh dak têh dăng, ƀon lan ƀư tơm, geh nău tâm ban n'hanh rsang rnglăy./.
Nuĭh rblang: Điểu Thân
Viết bình luận