Nău nchih bôk năp: Tâm rnglăp-du nuih n’hâm rlet rlău nuh srê têh 

          VOV4.M’nông: Lah kơp bah rnôk ntoh rơh srê tal 4 ta dŭt khay 3 năm aơ, nkôp đah ăp rơh bah năp, rơh srê aơ lĕ n’glơi an âk nău khuch hô, khuch hô tât ăp ntil bah nău rêh wăng sa, rêh jêng kon nuĭh. Rnoh nuĭh ntưp Covid-19 n’hanh khĭt na naơ hao, joi đă an geh trong njrăng n’gang srê ngăch, tâm di đah tĭng lvang, đê̆ đŏng lah tĭng rnôk. Tâm ăp rnôk nsrôih, đah nău ntĭm rđău bah Đảng, nău ƀĭt joet lam hvi, ngăch đah nu nău ngăn bah Chính phủ lĕ kơl an nkual ƀon têh Hồ Chí Minh n’hanh ăp n’gorr ntŭk srê mpeh bah Dâng, kơt lam dak ntơm dơi uănh nđôi srê. Âk nkual geh khuch hô ngăn lĕ ntơm lvang rdâk hao. Bôl bah năp măt hôm e âk jêr jŏt, yor srê na nao geh jêr jŏt, ngăch ntưp rêng, tât ndal, jêr nchroh, yơn lam dak hôm e nsrôih “NDREL SOAN-DU NUIH N’HÂM RLET RLĂU CHÔT SRÊ TÊH”. Aơ lah nkô̆ nău ăp nău nchih bah rmôt nchih nău Đài TNVN ƀư. Nău nchih bôk nău lah: Tâm rnglăp-du nuih n’hâm rlet rlău chôt srê têh

Uănh lĕ rngôch rup ndah trong ntưp srê Covid-19 tal 4, mô knŭng Việt Nam ma ăp dak ta lam ntŭr neh geh khuch hô. Trong rgâl ntil kaman Delta ntôn mô dơi nking n’gang, lĕ, dôl ntŭl rlong, ntêt nkri nău geh njrăng n’gang srê bah ăp dak, n’ăp ăp dak mpeh wăng sa, geh y học mhe kơt Mỹ hôm e geh tât hang rhiăng nuĭh khĭt ăp nar yor Covid-19. Dak Anh du nar geh rlău 30 rbăn nuĭh ntưp, Nga rlău 25 rbăn nuĭh... Mô đêt dak kơt Australia mô lah Singapore... tĭng nău ŭch zê-rô Covid-19 lôch uĕh âk khay bah năp, aƀaơ ngăch geh ntil kaman Delta plơ̆ rwăch tay chôt srê.

Tâm rơh ntoh ntil kaman Delta, Việt Nam mô geh êng bah dih. Rnôk rnoh kama n âk rlău 300 tơ̆ ăp ntil kaman bah năp nĕ, nău ntưp geh ngăch knŭng đêt mnĭt. Tât dŭt pơh bah năp, lam dak kơp dơn rlău 850 rbăn nuĭh ntưp. Covid-19 lĕ sa khĭt rlău 20 rbăn nuĭh. Trong kan manh dŏng, săm duh thăng kơt rse đơn. Trong kan dak si lam dak ơm ăp nar lĕ âk, aƀaơ lơ jêng mô tŏng âk lơn. Ta ăp ntŭk nkual srê, ta ăp ntŭk mô geh nar dơi dŏng gay ngăch ndâk njêng ngih dak si rdâng săm... ndrĭ yơn mô tŏng đah rnoh nuĭh ji hao hang rbăn nuĭh đê̆ đŏng rlău âk rbăn nuĭh du nar. Dak rhal, dak măt bah ăp rmôt bôk năp mô rlu hoch yor ntil kaman Delta ƀư nuĭh ntưp jêng mbăn ngăch. Âk nuĭh klach, ji bôk ta năp nău roh bah nuĭh bên:

          “Du he oh rnăk wâl 3 nuĭh geh Covid, sai oh tât 78 kg yơn nô nĕ mô dơi rdâng”.

          Hăn ndrel mô gĭt măng nar đah nuĭh ƀon lan rlău 6 khay njrăng n’gang srê, Chính phủ lĕ rgŏ jă dĭng lĕ nuĭh an trong kan aơ. Thủ tướng Chính phủ Phạm Minh Chính lĕ âk tơ̆ lah rjăp, an rgum nuĭh, mât njrăng nău rêh an nuĭh ƀon lan. Lơ jêr jŏt, ntoh lư, klach rvê, an tâm rnglăp gay joi trong mkra tâm di:

          “Rmêh rmên, dăn ôp nău, djăt nău rgop, săch trong mkra uĕh ngăn gay ƀư tĭng, rgŏ jă n’hâm soan bah lĕ trong chính trị n’hanh lam ƀon lan gay njrăng n’gang srê, đăp mpăn nu nău. Uănh jêr jŏt, ntul rlong lah nuih n’hâm gay rlet rlău, nsrôih mĭn lah tay n’hanh hao jêng. An nsrôih, janh dăng gay ƀư tĭng dơi ăp nău rƀŏng, trong mkra lĕ n’gluh an yơn ngăch, mĭn njêng mhe, tĭng nău na nê̆, nkre ƀư nkre rhoăt nău blău ơm ntop tay, lôch jêh mbrơi mbrơi, mô jăch ndăn”.

          Rơh srê tal 4 dŭt n’hâm hô, mô tĭng nău way n’hanh mô geh hŭch. Gay ndơ̆ ăp trong mkra, nău ntrŭnh khlay, Chính phủ an krêp tĭng nu nău ngăn. Ta rnôk chôt srê duh jêr ngăn, Thủ tướng n’hanh ăp nuĭh Chính phủ lĕ âk tơ̆ tât ntŭk srê nkual ƀon têh Hồ Chí Minh, Bình Dương.... uănh nđôi, ntĭm rđău trong kan njrăng n’gang srê. Ban ntĭm rđău ngih dak njrăng n’gang srê Covid-19 lĕ geh âk rơh pah kan sŏng dăng boăt nthoi tât rhiăng quận, nkuăl, nkual têh, tât hang rbăn ntŭk ƀoh gưl xă, phường, nkuăl têh, tă bah nĕ gay uănh nđôi n’hanh ntĭm rđău rjăp tât gưl bah dâng ƀư. Trong kan ntĭm rđău srê rah wah, khoa học n’hanh ntêm nkrem. Rơh bôk năp tĭng ntĭm rđău bah Thủ tướng Chính phủ sŏk xă phường ƀư nuĭh hăn lor njrăng n’gang hang rmưn “rmôt kan covid ntŭk gŭ rêh” ndâk njêng, mih duh krêp tĭng ăp ntŭk njrăng n’gang nkual đăp mpăn ƀon lan gŭ, nkhah êng ăp nkual ntôn geh srê. Ngih dak si bah dâng lĕ mât uĕh ƀư tơm, n’hâm soan dăng êng bah nơm. Đah ntrong kan “ngih dak si hăn ăp ntŭk”, ăp ngih dak si phường, xă lĕ ndơ̆ ndơ dak si tât ơm ngăn đah tĭng nuĭh ƀon lan, tĭng nkual ƀon lan gŭ, tĭng ngih măy, xí nghiệp. Bí thư n’gor uỷ Bình Dương Nguyễn Văn Lợi an gĭt:

          “Rnôk saơ F0 lah phung pah kan nuĭh lĕ chuh 2 nglay, 1 nglay vaccine ri an nkhah êng ta jay an ngêt dak si, uănh nđôi rnôk rgâl mbăn ndơ̆ hăn. He nchoeng n’gang nkual jêt, jêh nĕ puh rao kaman, F1 jêh nĕ du, 2 nar an nkra njêng tay kơt mhe nâm ơm, hôm mkra du đêt F0 ntĭl mpông ngih măy lah mô di nâm ơm. Aơ lah nău kan bah ngih dak si hăn ăp ntŭk”.

          Đah nău ƀĭt joet bah Chính phủ, du nău kan ntop kơl têh mô hŏ tă saơ an nkual ƀon têh HCM n’hanh ăp n’gor mpeh bah Dâng njrăng n’gang srê lĕ geh ta lam dak. Du n’gor, nkual ƀon têh rgŏ jă hang rhiăng y nai dak si, nuĭh kan dak si lăp nkual ƀon têh Hồ Chí Minh. Ăp rmôt bôk năp, rmôt kan Covid-19 ntŭk gŭ rêh, ăp rmôt kan, êng nuĭh kơl kan mô tĭng năm deh, mât uĕh nuih n’hâm tâm rnglăp lam rnoi mpôl, nchrăp lĕ yor săk soan nuĭh ƀon lan, yor nău uĕh neh dak, rnoi mpôl. Hang rmưn y nai dak si, nuĭh kan dak si, druh ndăm, sinh viên hăn trong njrăng n’gang srê mô klach rvê.

Nău tâm rŏng rnoi mpôl dơi rdâk hao di rnôk, mât uĕh săk rnglăy tam. Đah nău ƀĭt joet dŭt n’hâm bah Chính phủ, n’gâng kan nău kan n’hanh n’gâng kan ƀon lan ăp ntŭk, chôt srê Covid-19 ta lam dak lĕ ntơm dơi uănh nđôi. Jêh âk khay gŭ srang tâm nkhah, rup gui nău rêh nâm ơm mhe lĕ ntơm plơ̆ tay ta âk n’gor, nkual ƀon têh bah Bắc tât Nam.

          Nuĭh rblang: Y Sưng Phê Ja