VOV4.M’nông: Âk năm dăch aơ ăp ndrôm sam ƀŭt nchih bah bôk nău nkoch mbơh “Hăn ndrel đah oh tât ngih sam ƀŭt” tă bah Prăk nkrem mât njrăng n’hanh hun hao bri n’gor Kon Tum ƀư tâm bôk năm nti mhe lĕ kơl ăp oh kon hŏk, ngăn lah ta nkual rnoi mpôl đêt, nkual jru ngai dŭt jêr jŏt tâm n’gor geh sam ƀŭt nchih tât ngih sam ƀŭt. Mô knŭng ndrĭ ăp ndrôm sam ƀŭt nchih aơ hôm geh nău mbơh uĕh nđir ƀư uĕh nău kơl Trok nkhôm ntŭk ntô bri gay mât njrăng n’hanh hun hao bri nâp nâl n’hanh rgâl nău rêh an nuĭh ƀon lan.

          Ngih sam ƀŭt Tiểu học Nguyễn Văn Cừ, ta xă dŭt jêr jŏt Đăk Pxi, nkuăl Đăk Hà geh 275 oh kon hŏk n’hanh lĕ rngôch lah oh kon rnoi mpôl đêt Xơ đăng. Bah năp năm nti mhe 2021-2022, Ban Giám hiệu ngih sam ƀŭt pă nai tât jay ăp oh kon hŏk ta 3 ƀon: Đăk Kơ Đương, Đăk Rơ Wa n’hanh Đăk Wét uănh na nê̆ nu nău kon hŏk. Jêh uănh an saơ âk oh mô tŏng sam ƀŭt nchih, ndrôm sam ƀŭt nti n’hanh n’ăp kho ao gay tât ngih sam ƀŭt. Nău răm tât đah nai kon hŏk Ngih sam ƀŭt Tiểu học Nguyễn Văn Cừ rnôk geh nău mbơh Prăk nkrem mât njrăng n’hanh hun hao bri n’gor Kon Tum ƀư tĭng tay bôk nău nkoch mbơh “Hăn ndrel đah oh tât ngih sam ƀŭt” pă an du hê oh kon hŏk 7 ndrôm sam ƀŭt nchih geh nchih nău mbơh njrăng n’gang bri n’hanh ƀư tĭng nău kơl trok nkhôm ntŭk ntô bri ta ntô sam ƀŭt nchih. Nai Nguyễn Trung Dũng, Hiệu trưởng ngih sam ƀŭt an gĭt:

          “Rnoh sam ƀŭt nchih dơi pă tŏng ăp an ăp oh bah jrô 1 tât jrô 5 tâm lĕ du năm nti. Mpeh uĕh n’ha rđaih kơt ăp nău mbơh ri dơi in dŭt kloh, na nê̆ rgop ndrel đah ngih sam ƀŭt ntrôl nău ntĭm nti ăp oh rgâl tâm nău ƀư, nău wât: Tă bah ăp nău mbơh, ăp nkô̆ nău ma Prăk nkrem ntŭk ntô bri lĕ ƀư ta nĕ ndrel đah ngih sam ƀŭt ntĭm nti ăp oh ŭch bri dak neh ntu, gĭt uănh khlay n’hanh gĭt mât ntŭk ntô rêh bah nơm, mbra ƀư an ntŭk gŭ rêh rgâl nău wât gay ƀư uĕh trong kan mât njrăng n’hanh hun hao bri ta ntŭk”.

          Jay geh âk oh nô hăn nti, dơi an sam ƀŭt nchih bah bôk nău kan nkoch mbơh “Hăn ndrel đah oh tât ngih sam ƀŭt”, oh Y Thị Thư, rnoi Xơ đăng, kon hŏk jrô 4A an gĭt, knơm nĕ ma me bơ̆ oh mô rvê rwăt ndrôm sam ƀŭt nchih an ăp kon gay ntêm prăk tâm nău êng. Oh saơ dŭt ŭch ăp ndrôm sam ƀŭt nchih aơ:

          “Kon n’hanh ăp băl dơi an ndrôm sam ƀŭt nchih kon saơ dŭt rhơn. Kon răk ta sam ƀŭt aơ kon saơ ŭch đah bri dak neh ntu”.

          Ƀư tĭng Bôk nău kan nkoch mbơh nău “Hăn ndrel đah oh tât ngih sam ƀŭt”, ta năp năm nti mhe 2021-2022, Tơm prăk nkrem mât njrăng n’hanh hun hao bri n’gor Kon Tum lĕ njưal tât 169 ngih sam ƀŭt ta 76 xă, nkuăl têh ta lam 10 nkuăl, nkual ƀon têh tâm n’gor 600.000 ndrôm sam ƀŭt nchih n’hanh 5.000 môp ndô bôk gay pă an kon hŏk. Ta ntô sam ƀŭt nchih n’hanh môp dơi in ăp nău mbơh mpeh nău kơl trok nkhôm ntŭk ntô bri n’hanh mât uănh njrăng bri. Nău ƀư aơ nkre kơl ăp oh kon hŏk geh sam ƀŭt nchih, nkre tâm di nău đă ndơ̆ mbơh nu nău an nkoch trêng tât lĕ rngôch nuĭh ƀon lan tâm nkual pă dŏng ntŭk ntô bri. Wa Phan Thế Vinh, Kruanh UBND xă Hiếu, nkuăl Kon Plông an gĭt:

          “Bôk năm nti ăp năm tơm prăk nkrem ntop kơl an ăp mon rgop nta nơih an ăp mon tâm nău nti. Ndrôm sam ƀŭt nchih bah tơm prăk nkrem an ăp mon ta nkual rnoi mpôl đêt, nkual dŭt jêr jŏt geh nchih nău mbơh. Tĭng nkô̆ nău mbơh nĕ ngih sam ƀŭt lĕ nkoch trêng rgŏ jă kon hŏk mpeh mât njrăng bri. Tă bah nĕ ăp mon kon hŏk me bơ̆ rnăk wâl dơi gĭt đah nău mbơh aơ, n’hao nuih n’hâm mât njrăng bri ta lam xă”.

          Tĭng wa Hồ Thanh Hoàng, Kruanh tơm prăk nkrem mât njrăng n’hanh hun hao bri n’gor Kon Tum, ăp năm nti bah năp, Tơm prăk nkrem tâm rgop đah Ƀan giám hiệu ăp ngih sam ƀŭt ƀư an ndrôm sam ƀŭt nchih n’hanh môp tâm rgop nkoch trêng mpeh nău kơl trok nkhôm ntŭk ntô bri gay n’hao gĭt wât an ăp oh kon hŏk. Yơn lah, năm nti aơ, yor khuch bah chôt srê Covid-19, ntŭk kan mô ƀư kơt trong nchrăp bôk năp ma pă nuĭh n’hanh ndeh rdêng sam ƀŭt nchih, môp tât tĭng ngih sam ƀŭt, jao an Ƀan giám hiệu gay pă an ăp oh kon hŏk. Bôl geh khuch bah srê Covid-19, Bôk nău kan nkoch mbơh “Hăn ndrel đah oh tât ngih sam ƀŭt” bah Prăk nkrem mât njrăng n’hanh hun hao bri n’gor Kon Tum ƀư hôm dôl rêng lam hvi nău ŭch rŏng đah nău mbơh, ƀư tĭng uĕh nău kơl trok nkhôm mât uănh ntŭk ntô bri gay mât njrăng n’hanh hun hao bri nâp nâl n’hanh rgâl nău rêh jêng an nuĭh ƀon lan.

                    Nuĭh rblang: Y Sưng Phê Ja