`VOV4.M’nông: Jêh rnôk bah srê Covid-19, n’gor Gia Lai hŏ geh nau nchrăp joi ntrong ân nau kan pâl n’aih đah ăp nau ƀư geh rgum rƀŭn, nau kan văn hoá-thể thao ntơm rnôk aơ tât lôch năm. Ndrel ma nê, ăp mrôt kan leo nau kan pâl n’aih kŏ geh ăp nau kan gay ma rgum năch tâm dak nơm, lŏ ntrŭnh ân săk tam ăp nau kan dŏng leo pâl n’aih bah n’gor.

            Aơ lah rơh tal 2, nô Nguyễn Đình Đại (deh năm 1990, tâm Phường Đống Đa, nkuăl ƀon têh Pleiku) ndrel ma 5 nŭih băl păng hăn pâl uănh tâm leng K50, tâm nkuăl bri krŏng mâu njrăng êng Kon Chư Răng, nkuăl Kbang, ngai đah nkuăl ƀon têh Pleiku nklăp 90 km. Tâm rơh hăn 2 nar, du măng ta ntŭk aơ, ăp băl mom hŏ gŭ êp ăp lŭ rêh, gŭch ăp ntil ndơ sa tâm êp jâng leng dak. Mô geh sóng điện thoại, mô geh wifi, phung mom aơ knŭng gŭ pâl ngăn tâm nklang bri krŏng, đah chông dak leng hoch prêh 54 mét geh mbuh nglang, uănh trôm lŭ Hang Én, ŭm ngăn tâm dak rsang ngăr ndrel uănh kon dôk bri dôl ma gŭ yuh klơ tơm si, phung sĭm mpăr klơ trôk êp jâng leng dak. Ndrel tât uănh tâm nau rêh nklang bri, chuêl lĕ ăp nau tât jâk tâm nau rêh, kơl an nô Đại saơ geh ueh lơn jêh du pơh pah kan jâk rgănh bah nơm:

             ‘Kơt rơh hăn bah năp nơh gâp hăn jêr ngăn lăp, yor lah păng mô geh trong, âk nŭih ê geh saơ ơm chông dak leng nê. Yơn aƀaơ ri trong hăn lăp tât tâm leng dak kŏ nơh, bu năch nơih tât đŏng. Nkoch tât leng dak K50 ri păng ueh ngăn, gâp ê hŏ mâp saơ geh jâng leng dak ueh kơt nê ôh. Ntŭk mât njrăng êng bri hŏ đă cán bộ ntĭm phung hên hăn ndrel ntĭm leo hên hăn ân đăp mpăn, ngêt sa ân tŏng kah, mô dơi ân geh dah ma ân ndŏk lă lêng”.

            Tĭng wa Phạm Hoàng trực, Giám đốc Công ty Gotour Travel (nkuăl ƀon têh Hồ Chí Minh), nau kan pâl n’aih kơt aơ hăn tĭng du rmôt đê̆ nŭih, dôl lah nau kan ueh ân ƀư pâl n’aih jêh bah srê Covid-19. Yor Công ty kŏ vay pơk ăp tŏ hăn gay năch tă bah Sài Gòn tât Gia Lai gay ma uănh ntŭk bri ueh êng tâm vườn Quốc gia Kon Ka Kinh (nkuăl Mang Yang):

             ‘Tâm Tây Nguyên aơ, tât vườn Quóc gia Kon Ka Kinh, phung he mra dơi geh dâk êp mpôn jil geh rong, m’ơk lăp tâm bri ndrle bri chăt êng tă bah ơm gay ma ân năch nklih rup. Phung he mra dơi leo ăp rmôt kan bu ƀư nau kan, rmôt sinh viên hăn uănh thiên văn”.

            Gay dơi rdâng jêh bah srê Covid-19, công ty nkoch mbơh nau kan pâl n’aih Le Pleiku (trong Phan Đình Phùng) hŏ pơk âk trong pâl n’aih mhe kơt lah uănh tâm nkuăl ƀon têh yôk, nklih rup nkuăl ƀon têh yôk (Photo trip), nau kan pâl n’aih tâm bri-ncho duk-gŭ bĭch măng tâm du nar, đah rnoh tâm dâng 800 rbăn tâm du hê. Nô Hoàng Phương, Giám đốc Công ty mbơh, rnoh rguk, ma nar hăn geh gleh, yơn rmôt kan hŏ

 nkra trong hăn gay năch geh hăn âk ntŭk, nkre geh uănh, pâl, saơ ăp nau ơm ueh bah nkuăl neh aơ. Êng nê rmôt kan hôm rgum tâm ăp nau kan êng gay ma uănh, bri dak:

“Rnôk aơ, đah hên ntrŭnh 2 ntrong. Du trong lah nau kan ƀư văn hoá tâm ƀon lan bah nŭih tâm ntŭk. Tal bar lah ăp trong hăn tracking, trong 3 lah hao yôk Cư Nâm 2 nar du măng, 3 nar 2 măng tâm trong leng dak Hang Én K50 ân ăp nŭih ŭch uănh neh bri geh hăn tâm bri, ngêt sa tâm bri, bĭch nkre tâm bri, nau kan tal 3 đŏng lan nơm hăn tâm bri tơm n’ho Hà Tam, bri tơm si têh jŏ năm”.

Wa Nguyễn Trọng Hải, Giám đốc Công ty Cổ phần Cao nguyên Việt (Gia Lai) mbơh, ntơm năm 2020, srê Covid-19 ntoh luh, rmôt kan kơt lah mô geh năch tă bah dak ba dih ndrel tâm dak hăn dak ba dih. Yor ri, ntŭk kan uănh khlay lơn tâm nau hun hao nau kan pâl n’aih tâm dak, nau tơm pâl n’aih uănh leng ndrel rgâl ăp nau kan tâm rgop nsum ma ntŭk gŭ rlu:

 ‘Nau kan lah bu ŭch têm nkrem yơn kŏ ân geh tâm dăch dơh ma bri gle âk lơn. Ăp ntrong pâl n’aih gleh nar ndrel geh nau tâm săch êng êng. Mô geh ƀư dĭng lĕ kơt ntơm nơh, geh âk nau kan ân năch nơm săch, mô lah mô geh ngêt sa, mô lah gay ân âk nar tâm trong hăn pâl gay ma ân năch nơm gĭt…Nau tâm rgop đah công ty pâl n’aih nsum đah ntŭk kan gŭ âm kŏ geh nau ntrơn rgâl. Nơm leo năch tât ăp ngih gŭ âm tâm ăp nkuăl ƀon lan mô lah ăp ngih êp, tâm dăch”

Hăn nsum ndrel ăp ntŭk kan, bôk khay 3 năm 2021, Sở văn hoá, thể thao ndrel pâl n’aih Gia Lai geh nau nchrăp ntrŭnh ăp nau kan văn hoá, thể thao ndrel pâl n’aih ntơm rnôk aơ ân tât dŭt năm 2021. Tĭng nê, n’gor mra ƀư ăp nau kan rgum rƀŭn, tăch ndoh ndơ geh êng bah nkuăl kơt lah: Rơh tăch ndơ tuch tăm geh nsum ma nau ƀư tăch ndơ ngêt sa (nkuăl têh Ayun Pa), Nar pâl n’aih rgum (nkuăl Kbang), Nau tâm n’ur tur chĭng, mom ndăm, Pơh ƀư nau kan văn háo-pâl n’aih ndrel nau kan Festival chĭng gong Tât Nguyên (nkuăl ƀon têh Pleiku), pơh ƀư nau uănh kao njoăr êr (nkuăl Chư Prông)…Wa Nguyễn Đức Hoàng, Groi Giám đốc Sở văn hoá, thể thao-pâl n’aih Gia Lai, mbơh:

  ‘Lŏ ntrŭnh ăp nau kan bonh đă nau kan pâl n’aih tâm ăp ntŭk têh kơt lah ta Hà Nội, Nkuăl ƀon têh Hồ Chí Minh, ntrŭt dăng nau kan tâm rgop pâl n’aih đah ăp n’gor Bình Định, Phú Yên, Đà Nẵng, Quảng Nam, Kon Tum, Dak Lak, lŏ pơk trong ân ntŭk kan tăch rgâl râng nau ntuh kơl pâl n’aih, mbơh nkoch, râng ăp nau kan pâl n’aih nsum”.

Kơt tĭng đah ăp nau geh tât mhe, ăp ntŭk kan tăch rgâl tâm nau kan pâl n’aih ta Gia Lai dôl ma geh nau rgâl mhe, ndrel ma nê, nkuăl kŏ dôl nchră ăp nau kan văn hoá êng ueh gay ma nkoch mbơh rup gui, kon nŭih Gia Lai tât đah nŭih năch./.

Nŭih rblang: H’Thi