VOV4.M’nông:  Nkuăl Đăk Đoa, n’gor Gia Lai têh rlău 990 km2 đah 111 thôn, ƀon, njok jong rlău 17 xă, nkuăl têh. Rnoh neh hvi, ƀon lan srang, yơn knơm kơt dŏng uĕh ăp mạng xã hội kơt Zalo, facebook trong kan nkoch trêng ta ƀon lan soih lam mro n’hanh dơi geh săk rnglăy âk. Nguyễn Thảo, nchih nău an Đài TNVN gŭ ta Tây Nguyên geh nău nchih nkoch mpeh nău aơ.

Djôt ta ty điện thoại thông minh, nô Phạm Công Tùng, nuĭh ƀon lan thôn Tân Lập, xă Trang, nkuăl Đăk Đoa, Gia Lai ƀư rmôt Zalo bah thôn gay uănh nău mbơh chôt srê Covid-19. Nô Tùng an gĭt, ăp nar, ƀan ntĭm rđău njrăng, n’gang srê bah xă njuăl 2 nău mbơh lah uănh nu nău srê ta n’gor Gia Lai n’hanh nău mbơh ăp n’gor, nkual ƀon têh geh srê. Âk nău mbơh dơi ƀư âk trong rup ndah, jêng ăp nuĭh dơh gĭt oh kon nơm hăn nti, hăn kan plơ̆ sĭt ri an nkhah êng rgum, an mbơh săk soan n’hanh uănh nđôi êng săk soan ta jay. Tă bah Zalo aơ đŏng, nuĭh ƀon lan tâm thôn ntop kơl ƀan ntĭm rđău groi nđôi nuĭh ƀon lan ƀư rjăp ăp nău ntrŭnh mpeh njrăng n’gang srê đŏng lah mô:

“Nău groi nđôi nuĭh ƀon lan bah nkual srê plơ̆ sĭt mô lah nuĭh ƀon lan lĕ nar nkhah êng rgum plơ̆ sĭt jay nkhah êng ta jay, oh kon hăn nti, hăn kan sĭt ri mpôl hên groi nđôi. Oh kon hăn nti sĭt ri nuĭh ƀon lan lĕ gĭt tât, mbơh tă bah nchih njuăl nău, mbơh trang nsum, mbơh ngih dak si, UBND xă gay đă khân pơng ƀư mbơh săk soan gay nuĭh ƀon lan mô klach rvê”.

Đăk Đoa jêh rnoh an ƀư mpeh pă căn cước nuĭh ƀon lan, ma hôm e đăp mpăn njrăng n’gang srê

Wa En-Kruanh UBND, Kruanh ƀan ntĭm rđău njrăng, n’gang srê Covid-19 xă Trang, nkuăl Đăk Đoa an gĭt, aƀaơ, 5 thôn tâm xă lĕ geh rmôt Zalo. Du rmôt geh bah 120 tât 150 nuĭh lah ntoh măt bah ăp rnăk. Ƀan ntĭm rđău njrăng, n’gang srê bah xă tâm pă nuĭh râng ăp rmôt gay dơh ơh dâl ăp nău ôp bah nuĭh ƀon lan. Geh rnôk, nĕ lah ăp nău ôp mpeh sam ƀŭt mbơh săk soan, geh rnôk ăp nău ƀư rnôk nkhah êng ta ta jay, geh rnôk ôp tay nău mbơh mpeh ăp nuĭh ƀon lan bah n’gor, nkual ƀon têh êng sĭt ƀon lan lĕ mbơh săk soan đŏng lah mô.

“Knơm ăp rmôt Zalo aơ tâm nar bah năp, ta xă lĕ wơt dơn 143 nuĭh ƀon lan sĭt bah ntŭk êng. Tâm nĕ, du đêt nuĭh ƀon lan ƀư nkhah êng rgum, du đêt nkhah êng ta jay. Nuĭh ƀon lan lĕ boăt nthoi Zalo ri uănh săk ăp ntŭk geh srê, bu gĭt, bu nchrăp lor. Lah ma nkual ƀon têh Hồ Chí Minh ƀư tĭng Ntĭm đă 16 bu nchrăp hăn ngih dak si”.

Thiếu tá Khuất Đức Hiệu-Kruanh Công an xă Trang an gĭt, knơm săk rnglăy tâm ôp bah ăp rmôt Zalo, bah khay 3 tât khay 6/2021, ntŭk kan lĕ jêh rnoh an pă rlău 3.600 thẻ căn cước nuĭh ƀon lan ma hôm e đăp mpăn nău way njrăng, n’gang srê. Công an xă Trang mbơh mpeh mông nar, ntŭk ƀư sam ƀŭt pă thẻ căn cước nuĭh ƀon lan. Nuĭh ƀon lan knŭng tât ntŭk pă thẻ 2 tơ̆ lah rnôk sŏk mrô tĭng nuĭh n’hanh ƀư sam ƀŭt. Yor rĭ, nuĭh ƀon lan mô geh kâp, sam ƀŭt hôm e soih ăp n’hanh đăp mpăn tâm ƀah, mô rgum rlău 20 nuĭh ta ntŭk ƀư thẻ căn cước nuĭh ƀon lan:

 “Jêh sŏk mrô, he jă bu lăp Zalo bah he dâl, đă kônh wa sĭt jay, sĭt tât jay bu tâm jă, nkoch trêng êng. Nklăp 30 mnĭt nchih njuăl du tơ̆ mbơh kônh wa, aƀaơ tât mrô 59 ri ăp mrô 69 lah bu nchrăp, bu tât. Tâm rgâl nău mbơh ta trang Zalo aơ, geh nău dơh nơih an nuĭh ƀon lan n’hanh mô rgum âk nuĭh”.

Tĭng kơp uănh bah nkuăl Đăk Đoa, aƀaơ ta ntŭk geh rlău 40 rbăn mrô điện thoại di động geh dŏng 3G, 4G. Mĭn aơ lah du trong mbơh săk rnglăy, ngăch n’hanh đêt prăk, bah khay 3/2020, UBND nkuăl Đăk Đoa lĕ jao Công an nkuăl ƀư ăp fanpage ta facebook n’hanh trong mbơh nău Zalo official Account  an UBND n’hanh Công an bah 17 xă, nkuăl têh ta lam nkuăl. Ta aơ, nuĭh ƀon lan dơi uănh nău mbơh wăng sa-rêh jêng ta ntŭk, uănh nđôi ngăch mkra sam ƀŭt hành chính n’hanh nău mbơh chôt srê. Ta xă, ntŭk kan ntop kơl ăp thôn ƀư ăp rmôt Zalo gay tâm ôp đah nuĭh ƀon lan mpeh trong kan njrăng n’gang srê Covid-19.

Đăk Đoa jêh rnoh an ƀư mpeh pă căn cước nuĭh ƀon lan, ma hôm e đăp mpăn njrăng n’gang srê

Nău khlay lơn lah ăp trong mbơh nău bah gưl nkuăl, tât xă, jŭr thôn, ƀon dơi boăt nthoi nsum. Yor rĭ, knŭng lăp rmôt aơ, nuĭh ƀon lan dơi kuăl điện thoại dâl đah kruanh ƀan ntĭm rđău njrăng, n’gang srê mô lah kruanh Công an xă, nkuăl lah ŭch. Đại úy Đàm Mai Minh Tuấn, Groi Đội trưởng Đội Xây dựng phong trào mât njrăng rnă njrăng neh dak, Công an nkuăl Đăk Đoa an gĭt, nău ƀư tâm ăp rmôt online lĕ kơl n’hŭch prăk, nkre săk rnglăy nkoch trêng dơi n’hao na nê̆

Jêh rnôk mbơh ƀư rmôt Zalo n’hanh fanpage, mông nar nchrăp ăp sam ƀŭt rhăch nău đêt lơn. Rnoh druh ndăm dŏng mạng xã hội âk lơn nuĭh têh, ri rnoh nuĭh he gĭt uĕh lơn, đăp mpăn âk lơn. Rnôk cán bộ hăn tât ƀon ƀư rup gui, nchih nău, video, măy mŏk djôt dŭt âk, jêr jŏt. Yơn ta mạng xã hội, dŭt ngăch dơh, knŭng sŏk nău mbơh 3 tât 4 giây lah ăp nuĭh gĭt hôm”.

Nău dŏng máy tính, điện thoại thông minh aƀaơ lĕ âk ta n’gor Gia Lai, n’ăp ăp ntŭk nkual jru ngai; nău nuĭh ƀon lan dŏng ăp mạng xã hội gay tâm nđŭr, tâm ôp lĕ dŭt âk. Kơt dŏng mạng xã hội tâm mât uănh ƀĭt joet, ăp ngih pah kan, jrô kan, ƀan, ăp thôn-xă ta Đăk Đoa lah êng, Gia Lai lah nsum lĕ mkra uĕh nău jêr jŏt yor jru ngai, kơl ndơ̆ nuĭh ƀon lan tât êp lơn đah n’gâng kan ăp gưl. Tâm nău gŭ srang tâm ƀah kon nuĭh njrăng n’gang srê Covid-19, ăp ndơ dŏng nĕ lơ an saơ săk rnglăy na nê̆, rgop n’hŭch chôt srê, đăp mpăn mât uĕh nkra njêng tăch rgâl./.

          Nuĭh rblang: Y Sưng Phê Ja