VOV4.M'nông: Ƀan rđău đă njrăng, n'gang nuh srê Covid-19 Gia Lai mbơh gĭt, tâm măng 4/8, năl geh tay 25 nuĭh ntưp Covid-19. Lĕ rngôch rnoh nuĭh ntưp tâm nar lah 38 nuĭh. Aơ lah rnoh nuĭh ntưp tâm nar dŭt âk bah ntơm tât aƀaơ. Na nê̆, tâm 38 nuĭh ntưp Covid-19, lơn âk lah nuĭh tă bah nkual nuh srê sĭt, dơi an gŭ rgum êng n'hanh uănh năl mham lor rnôk lăp tâm n'gor. 3 nuĭh lah F1 bah nuĭh ji mbrô BN 36712; 1 hê lah nuĭh groi ndeh rdeng ndơ, rdeng ndơ bah nkual ƀon têh Hồ Chí Minh- Đồng Nai hăn n'gor Kon Tum, hŏ weh n'hanh gŭ tay ta nkual ƀon têh Pleiku ntơm bah nar 30/7 tât aƀaơ. Nuĭh dja dơi năl ntưp Covid-19 rnôk hăn uănh năl êng mham ngăch. N'gor hŏ ƀoi tĭng n'hanh uănh năl ngăch 10 nuĭh lah F1. Lôch uănh năl mô mpơl ntưp đah SARS-CoV-2 da dê. Ndrĭ, ntơm bah nar 26/4 tât ôi 5/8/ 2021, n'gor Gia Lai năl geh 159 nuĭh ntưp đah SARS-CoV-2, tâm nê geh 7 nuĭh hŏ sĭt bah nhih dak si./.

Nuĭh rblang: Điểu Thân