VOV4.M’nông:  Rlău 34 ha bri njrăng n’gang ta Tiểu khu 1065 yor UBND xă H’Bông, nkuăl Chư Sê, n’gor Gia Lai mât uănh geh phah, kuih chuk ntơm bah khay 3/2021 tât bôk khay 9/2021. Tât rnôk 34 geh ăp nuĭh dâu kloh, 23 ha tâm nĕ lĕ tăm bạch đàn, ri rmôt kan dơi kan bah nkuăl mư saơ, nking n’gang. Nu nău rŭn in phah bri hô aơ mô knŭng an saơ nău nŏng janh bah ăp nuĭh tih, ma hôm saơ nău jêr tâm nău jao bri, mât uănh bri ta ntŭk.

Nu nău geh ta ăp lôk 1, 2 n’hah 4, Tiểu khu 1065, bri nchăng n’gang phŭt sial ta neh gưl mât uănh bah UBND xă H’Bông, nkuăl Chư Sê. Ta ntŭk, ăp nuĭh lĕ ndâk ƀư n’hưp choanh đah tŏng ăp ndơ dŏng n’hanh măy mŏk lăp kuih chuk bri, tăm rlău 23,5 ha bạch dàn, 11 ha hôm ƀa ƀă lĕ dơi dâu su kloh tơm si. Wa Rmah H’Bé-Kruanh UBND nkuăl Chư Sê, Gia Lai an gĭt, ăp nău kan bah nkuăl mĭn lah, nău rŭn in bri nchăng n’gang phŭt sial geh hô aơ geh tâm n’gul năm, bah khay 4 tât khay 9/2021, Tâm rnôk lĕ trong chính trị ta ntŭk rgum njrăng n’gang srê:  

“Năm 2021, nkuăl Chư Sê geh srê Covid-19. Xă H’Bông geh 1 thôn an nchoeng n’gang, jêng trong chính trị rgum njrăng n’gang srê, rmôt kan đêt, uănh nđôi mô tŏng ăp. Yor nê an geh nău aơ, mpôl hên saơ jêr jŏt”.

Nuĭh tih ƀư n’hưp choanh n’hanh ndơ̆ măy mŏk tâm bri gay kuih chuk, tăm bạch đàn. Dĭng lĕ rnoh neh bri nchăng n’gang phŭt sial geh tih lah 34,6 ha.

Bah meng nkô̆ nău geh aơ, wa Bùi Văn Cường-Groi Kruanh UBND xă H’Bông, nkuăl Chư Sê an lah hôm e geh ăp nău jêr tâm trong kan jao bri. Wa Cường an gĭt, n’gul năm 2019, rnôk Ƀan mât uănh bri njrăng n’gang phŭt sial Ayun Pa lĕ chrai, ƀon lan dơi jao rlău 3.800 ha bri, tâm nĕ geh rlău 2.100 ha bri njrăng n’gang phŭt sial yơn mô geh ndeh rklư n’hanh rmôt way mât uănh gay ƀư tĭng nău kan. Gưl neh bah ƀon lan lah bri kâng n’har đah 2 nkuăl Phú Thiện n’hanh Mang Yang, ƀư an nău mât bri mâp âk jêr jŏt:

“Jêh rnôk xă H’Bông dơn gưl neh bri aơ ri geh âk jêr jŏt kơt hăn rlău trong dak me, mô lah rlău 2 nkuăl Phú Thiện, Ia Pa, n’ăp hăn, n’ăp sĭt lah nklăp 100km. UBND xă mô geh rmôt way kan kơt đah kiểm lâm”.

Nuĭh tih lĕ ngăch tăm 23,5 ha bạch đàn ta neh bri nchăng n’gang phŭt sial

Geh tât nău phah bri hô aơ, wa Thái Thượng Hải, Hạt Trưởng Hạt kiểm lâm nkuăl Chư Sê, an gĭt, ntŭk kan dôl nsrôih uănh nđôi, ƀư kloh ăp nuĭh tih:

“Nu nău dŭt hô, jêng Hạt kiểm lâm lĕ ndrel ăp nău kan dơi kan kơt ngih pah kan cảnh sát uănh nđôi, Viện kiểm sát hăn uănh ta ntŭk. Bôk năp lĕ rgum ăp nuĭh, sŏk nău mbơh gay gĭt nuĭh tơm bah nău ƀư aơ. Đah rnoh neh bri lĕ chuk, kay phah têh, lơn lah aơ lah bri nchăng n’gang phŭt sial, ri Hạt kiểm lâm nsrôih nchăng n’gang, joi nuĭh tih, rmal rjăp tĭng pháp luật”.

Ndrel nău ntĭm rđău dŭt n’hâm uănh nđôi, ƀư kloh nu nău, UBND nkuăl Chư Sê lĕ mbơh nu nău tât UBND n’gor Gia Lai, N’gâng kan tuch tăm mât rong n’hanh hun hao ƀon lan n’gor, dăn đă jao bri nchăng n’gang phŭt sial ta ntŭk an ăp ntŭk kan way kan, gay pah kan njrăng n’gang, mât uănh bri geh săk rnglăy uĕh lơn./.

          Nuĭh rblang: Y Sưng Phê Ja