VOV4.M’nông: Kêng măng 28/5, lôch uănh năl mham, Ntŭk rgum mât kân nuh srê (CDC) Gia Lai năl geh 1 hê nuĭh ntưp đah SARS-CoV-2 geh tơm ntưp bah Hà Nội. Na nê̆, nuĭh ji L.H.L deh năm 1977, gŭ ta thị trấn Kông Chro, nkuâl Kông Chro, Gia Lai).

Nuĭh dja tă bah F1 bah nuĭh ji Covid-19 mbrô 5410. Lôch ƀoi tĭng têl, CDC Gia Lai năl 18 nuĭh lah F1 n'hanh 95 nuĭh lah F2 bah nuĭh ji dja. Aƀaơ, ăp nuĭh dja hŏ dơi an gŭ rgum êng di nău way; nkre ăp ntŭk nuh srê geh tât nuĭh ji dja hŏ dơi ntĭl mpông, lĭr nchih mbơh njrăng n'hanh dơi puh dak si, puh nkhĭt kaman tĭng di nău way. Ƀan rđău đă njrăng, n'gang nuh srê Covid-19 Gia Lai dăn đă ăp n'gâng kan, ăp nkuâl n'hao dăng rnoh mbơh njrăng lor đah nău njrăng, n'gang nuh srê; tĭng ƀư jăp tay nău ôp uănh ăp tŏng lam lĕ rngôch ăp nuĭh sĭt bah ntŭk geh nuh srê, ăp nuĭh rnâng kan, nuĭh dak bah dih dôl pah kan ta n'gor, geh trong uănh năl tâm di gay njrăng, n'gang nuh srê./.

Nuĭh rblang: Điểu Thân