VOV4.M'nông: Nar 18/10, mpôl pah kan bah n'gor Gia Lai hŏ wơt 296 nuĭh ƀon lan lĕ ma bu ur bŭn, kon se, bu ranh, nuĭh rnoi mpôl đê̆ pah kan, gŭ rêh ta nkual nuh srê mpeh bah dâng plơ̆ sĭt n'gor đăp mpăn. Bah năp nê, mpôl pah kan bah n'gor Gia Lai lĕ rngôch 22 nuĭh, đah nău ntop kơl bah 13 bôk ndeh bah tơm ndeh Phương Trang hŏ hăn wơt nuĭh ƀon lan plơ̆ sĭt bah nkual nuh srê. Mpôl hăn tâm pă ƀư 3 rmôt wơt ƀon lan ta 3 ntŭk ta 2 n'gor Bình Dương, Đồng Nai n'hanh nkual ƀon têh Hồ Chí Minh. Tât 3h kêng măng nar 17/10, mpôl hăn hŏ sĭt tât Gia Lai tâm ôi 18/10. Rnôk tât rgum ngăch ta nkual an gŭ rgum êng dĭl, ăp nuĭh ƀon lan dơi cán bộ, tahen ntĭm nti puh nkhĭt kaman, weh duh săk; mbơh ngăch dăng n'hâm suan, nkre tâm pă mbor, tâm pă ntŭk an gŭ rgum êng đăp mpăn n'hanh di nău way. Rơh dja, nchrăp bôk năp n'gor mbra wơt 604 nuĭh, yơn tă bah âk nkô̆ jêng rnoh nuĭh sĭt đêt lơn./.

Nuĭh rblang: Điểu Thân