VOV4.M'nông: Groi Thủ tướng Lê Văn Thành ƀư tơm rơh tâm nchră pơk sŏng dăng "Droh rklaih jêr jŏt, kŏ kol an ăp doanh nghiệp ƀư njêng ta ăp nkual công nghiệp, nkual wăng sa, nkual nkret njêng ndăng, nkual công nghệ cao n'hanh rkŭm công nghiệp”, ƀư nar 20/9 ta Hà Nội. Tĭng Bộ kế hoạch n'hanh Đầu tư, nuh srê Covid-19 tât krit nji, ntoch jong, lơh khuch têh an doanh nghiệp, an nuĭh ƀon lan. Âk doanh nghiệp ân rlu kan tă bah tăch gâl rêng pă an ndơ dŏng kan, rêng ƀư njêng, rêng tơm nuĭh kan, âk doanh nghiệp ân mplơ̆ si ƀŭt ton dăn rvăt ndơ, ntoh rnon mô dơi trok, khuch tât nău rêh bah hang rkeh nuĭh kan tâm ăp nkual công nghiệp, nkual wăng sa, nkual nkret njêng ndăng...Gay droh rklaih jêr jŏt, dâk hao tay nău kan ƀư njêng tăch rgâl ăp doanh nghiệp dăn đă Chính phủ mĭn uănh an dŏng ăp trong nkra, trong leo ƀư nkret njêng geh nău dơi gay doanh nghiệp sơch trong ƀư tâm di đah tĭng nău geh na nê̆; an doanh nghiệp lor nchrăp an ƀư ăp bôk nău kan ƀư njêng tăch rgâl tâm di đah nău dơi geh bah tĭng doanh nghiệp. Nkre, dăn đă ăp n'gor, nkual ƀon têh mô dah ma rŏng dŏng êng ăp trong njrăng n'gang nuh srê, ƀư jêr jŏt an doanh nghiệp rnôk rdeng hăn ndơ tăch n'hanh nuĭh kan plơ̆ hăn pah kan tay./.  

Nuĭh rblang: Điểu Thân