VOV4.Mnông-Leo rơh rƀŭn nchră ndal tâm rdâng đah phŭt mbrô 6 geh ƀư kêng măng nar 23/9 ta Hà Nội, groi Thủ tướng Lê Văn Thành- kruanh rnâng kan ntĭm leo ngih dak mpeh njrăng rdâng nău tât bâh mih sial- kruanh Ủy ban ngih dak tâm rdâng đah nău tât bâh mih sial n’hanh vơt joi nuĭh rmanh đă, ăp ntŭk mô dơi mô njrăng tâm rdâng, an geh mât đăp mpăn nău rêh kon nuĭh ngăn lah rnôk nuh srê Covid-19 dôl geh ntưp âk aƀaơ. mbơh tơih ngăch bâh rnâng kan ntĭm leo ngih dak mpeh njrăng rdâng nău tât bâh mih sial an saơ, aƀaơ an geh 21 duk mpan bâh ăp n’gor nkuăl bon têh kơt: Đà Nẵng, Bình Định, Quảng Ngãi tâm ntŭk mbra geh nău tât, mpôl kan tahen dak lêng lĕ ndrel đah ăp  rnăk vâl tơm duk mpan tâm ôp ƀa ƀơ đah ăp ntil duk mpan ta dak lêng ngăch sĭt tât kơh đăp mpăn. Groi Thủ tướng Lê Văn Thành đă ăp ntŭk kơt Đà Nẵng, Quảng Nam ngăch ntĭm ăp duk mpan luh nkual mbra geh nău tât bâh phŭt. Nkre lah an geh njrăng mât đăp mpăn nuĭh ƀon lan ta ăp nkual geh nău tât mpeh dak buk dak rchoh, pĭch rluh neh tâm ban kơt mbra mbơh nău kan ntrơn ƀon lan mât đăp mpăn nuĭh n’hanh drăp ndơ, nkre lah mât đăp mpăn nuh srê Covid-19.

Nuĭh rblang: Thị Đoắt