VOV4.M'nông: Nar 15/10, ta Hà Nội hŏ ƀư Lễ nkah ndray 91 năm nar njêng Hội liên hiệp bu ur Việt Nam (20/10) n'hanh pă an ndơ nkhôm rnê Bu ur Việt Nam. Râng n'hanh lah ta rơh lê, Groi Thủ tướng Rnâng kan Chính phủ Phạm Bình Minh mbah rhơn ăp nsum mpôl, ăp nuĭh geh ndơ nkhôm rnê Bu ur Việt Nam.

Mpơl nău ŭch rŏng let năp tay ăp mpôl, ăp nuĭh rhơn geh ndơ nkhôm rnê ân mât tay nuih n'hâm rŏng kan, blău ƀư njêng mhe, njêng luh ăp săk ntơ Việt têh tâm ban dak bah dih. Groi Thủ tướng Phạm Bình Minh dăn đă ăp n'gâng kan, ăp n'gor uănh khlay, tĭng ƀư jăp uĕh lơn đŏng ăp trong kơl đah nău hun hao bah bu ur lah nsum n'hanh bu ur ntơm njêng nău kan lah êng. Ăp gưl Hội blău ƀư mhe tay, pơk hvi buăt nthoi, lor nchrăp tâm boh đah ăp n'gâng kan, ăp doanh nghiệp gay an  ƀư geh nău tam lơn Đề án “Ntop kơl bu ur ntơm njêng nău kan". Gay nar lơn ma geh âk mpôl, âk nuĭh bu ur ntơm njêng nău kan geh nău dơi./.

Nuĭh rblang: Điểu Thân