VOV4.M’nông – Nar 21/9/2021, Chính phủ Italia mbơh ntrŭnh an ntop kơl tay 796.000 dĭng vaccine AstraZeneca an Việt Nam tă bah trong ƀư COVAX gay ntop kơl Việt Nam rdâng đah chôt srê Covid-19. Nău ntrŭnh mhe ngăn aơ n’hao dĭng lĕ vaccine ma Italia ntop kơl an Việt Nam rlău 1,6 rkeh dĭng, ndơ̆ Việt Nam jêng ngoay tâm âk dak kan ndrel kơl lor dơn vaccine têh ngăn bah Italia ta lam ntŭr neh. Italia lah ngoay tâm âk dak Liên minh châu Âu (EU) ntop kơl ân ngăn an Việt Nam tă bah trong ƀư COVAX. Aơ lah nău kơl khlay n’hanh ngăch, an saơ nuih n’hâm tâm rnglăp bah chính phủ n’hanh nuĭh ƀon lan Italia đah Việt Nam tâm lvang jêr jŏt. Bah năp nĕ, nar 14/9/2021, Việt Nam lĕ wơt dơn 812.060 dĭng vaccine bah Italia rhŏ an nău chuh njrăng n’gang Covid-19.

Nuĭh rblang: Y Sưng Phê Ja