VOV4.M’nông: Ôi lơ 6/9, UBND n’gor Kon Tum ƀư nau ntơm leo rmôt cán bộ nau dak si bah n’gor râng nau kan njrăng, rdâng srê Covid-19 tâm n’gor Bình Dương. Tĭng nau nchrăp, rmôt 30 nŭih nai dak si, điều dưỡng bah n’gor Kon Tum mra ƀư nau kan tâm n’gor Bình Dương tâm 30 nar. Lor ma hăn, ăp nŭih tâm rmôt hŏ râng ntĭm nti 6 nar yor n’gâng kan Kon Tum ƀư rgum tâm nau kan năl săm, nau blau sŏk mẫu, ƀư xét nghiệm năl SARS-Cov2 đah nau kan Realtime PT-PCR.

  Rđau kan n'gor Kon Tum mâp măt ăp nai dak si

  Ntoh nau bonh đă ăp nai dak si, điều dưỡng bah n’gor lor ma hăn, wa Lê Ngọc Tuấn, Kruanh UBND n’gor Kon Tum ŭch: ăp nŭih tâm rmôt mra ƀư ueh nau kan tâm rnglăp, tâm kơl, rklaih nau jêr tâm rnôk ƀư nau kan, mât n’hâm soan ndrel đăp mpăn ân ƀon lan. Gay bonh đă nuih n’hâm, kơl an rmôt kan tâm rnôk ƀư nau kan bah n’gor Bình Dương, UBND n’gor Kon Tum, n’gâng kan dak si, Liên đoàn Lao động n’gor, Công ty Cổ phần sâm Ngọc Linh Kon Tum hŏ pă ân ăp nŭih tâm rmôt kan dĭng lĕ lah 285 rkeh prăk./.

Nŭih rblang: H’Thi