VOV4.M’nông: Tâm 9 khay rlau aơ, Kon Tum lah n’gor geh nau rgum ntuh kơl bôk nau kan bah dih tơm prăk mô lăng âk ngăn rđil đah ăp n’gor êng bah nkuăl Tây Nguyên. Bah năp nau aơ, ta rơh rƀŭn tal 5 Rnâng kan rđau kan Đảng bộ n’gor gưl XVI pơk hvi mhe geh tâm rơh rlau aơ, n’gor uỷ Kon Tum hŏ dŏng âk nar gay rgum nchră nau kol, joi trong rgum ntuh kơl.

Tâm 9 khay rlau aơ, n’gor Kon Tum rgum geh dơi 28 nau kan ntuh kơl đah tơm prăk đăng ký rlau 8000 rmen prăk, yơn ăp nau kan aơ hôm tâm rnôk ntuh kơl tâm săm ƀŭt. Ngăn lah, rnôk aơ mhe geh 2 nau kan ƀư jêh ndrel leo lăp dŏng kan đah rnoh tnuh kơl rlau 10 rmen 5 nau kan dôl ƀư đah rnoh 24 rmen ndrel âk nau kan bah 21 nau kan hôm e dôl geh tâm rnôk ƀư jêh. Tĭng wa Ngô Việt Thành, Giám đốc N’gâng kan nchrăp kan ndrel ntuh kơl n’gor Kon Tum, du nau kol tâm nau rgum ntuh kơl bah n’gor lah nau kan geh tât neh ntu:

‘Bơi tât 90% bôk nau kan geh tât neh ntu kŏ geh nau tih êng đah nau rgum 3 ntil bri đah du nau ngăn lah neh rnôk aơ ri ma hôm geh nau tâm rkăng tâm nau kan ndơn nau ntuh kơl. Êng nê, rnoh nau kan đă nau rgum gay ma hun hao văng sa rêh jêng mô lah rgum neh ntu mô geh tâm di đah nau đă bah ntuh kơl. Jêh ri du đê̆ UBND nkuăl, nkuăl ƀon têh rnôk geh mbơh rnoh neh kŏ mô geh kơp ngăn tât rnôk nŭih tơm ntuh kơl ƀư săm ƀŭt ri mâp nau jêr, tâm nkol đah ăp nau kan hŏ ân tơm ntuh kơl ndrel tâm rkăng đah ăp nau kan geh pă dơi mô lah mô tâm di đah nau rgum nsum”.

Ndrel ma nkô̆ nau nê, ăp nau kol đŏng tâm nau kan rgum ntuh kơl tâm n’gor Kon Tum kŏ geh nchŏng kloh nê lah nau ê nâp tâm nau mât nŭih ƀư tơm, ntŭk kan. Ngăn lah mô tâm ban tâm nau rgop nau năl ƀư geh nau khuch tât nau nâp, nar ƀư kan bah ăp bôk nau ntuh kơl, ăp nkuăl ê geh kơt tĭng dơi nau kan mêt uănh, nchră ƀư ntuh kơl gay ma năn gĭt kloh, doh rklaih nau jêr bah nŭih ntuh kơl, mô tŏng nau nâp tâm nau kan nau mêt uănh ntuh kơl bah nau kan. Nkoch tât nau kan bah n’gor tâm nau rgum ntuh kơl, Uỷ viên Trung ương Đảng, Bí thư n’gor uỷ, Kruanh HĐND n’gor Kon Tum Dương Văn Trang nkah ngăn tât nau dơi ndrel nau kan bah nŭih rđau kan đah nau đă ân geh nau rgâl ngăn:

‘Phung he lah nsum tâm nê geh ngoai, bar nŭih lah ƀư nau kan ê geh nau nâp ndrel ê geh nau gơih ngăn yor nau kan nsum bah n’gor, yor nau kan bah ƀon lan. Tâm nau kan ma nchră tât mpeh rnoh nau blau nau ntuh rlong geh nkô̆ nau lah ƀư nau kan ân dơi bah rđau kan. Ri n’gor kŏ lah rđau kan yơn ma n’gâng kan ba lơ kŏ lah rđau kan đŏng, rđau kan ba lơ. Hôm nơm lah bu tât ri nơm mâp, lah mô tât ri mô mâp, mô kâp. Ntŭk ƀư nau kan tăch rgâl lah khân păng ŭch ri khơm, ri ach o mro nau văng sa rêh jêng mô dơi geh nau hun hao ôh”.

Ndrel ma nau kơp dơn nau kol, nau nsôih ndâk njêng ntŭk ntuh ntuh kơl ndâk njêng ntuh kơl ntŭk ntu ân kloh aih, nơih ndrel blau nau ƀư kan mhe gay ma rgum nau ntuh kơl, du nau kan đŏng lah kŏ dôl ma kâp geh n’gor Kon Tum ƀư ân rjăp, nê lah kơp, nsôih jăng lơi ăp nau ntuh kơl mô tŏng nau blau, nau nâp, ntuh kơl tĭng trong mô ueh kâp săch lor ntŭk gay ma jêng ntrơn jêng nau kan ân geh săk rnglay ma nơm./.

Nŭih rblang: H’Thi