VOV4.M’nông: N’gor Kon Tum ndŏ nkô̆ nau kan tâm 5 năm tât nsôih geh 4 nkuăl ndrel nkuăl ƀon têh Kon Tum geh tĭng nau dơi ƀon lan mhe mô lah ƀư jêh nau kan ndâk njêng ƀon lan mhe. Gay dơi geh nau kan aơ, n’gor Kon Tum kơp năn ân geh ƀư ueh 8 rmôt nau kan, ntrong kan, tâm nê uănh ngăn nau nkoch trêng gay ƀon lan nsôih geh nau râng ndâk njêng ƀon lan mhe.

Tât rnôk aơ, n’gor Kon Tum geh 28 xã geh kơp dơn xã tŏng dơi ƀon lan mhe. Êng nê, geh 10 xã geh tŏng ntơm 15 tât 18 nau dơi, 45 nau kan geh ntơm 10 tât 14 nkô̆ nau ndrel 2 xã geh tŏng nau kơp dơn ntơm 8 tât 9 nkô̆. N’gor Kon Tum geh nkô̆ nau tâm 5 năm tât nsôih geh 4 nkuăl ndrel nkuăl ƀon têh Kon Tum geh tŏng nau dơi ƀon lan mhe hao gŏ lơ ndrel 100% rnoh xã geh tŏng nau dơi khlay tâm nau ndâk njêng ƀon lan mhe, kơt: Rgum kan, gung trong, trong hoch dak, điện, ngih vâl văn hoá, ngih gŭ, rnoh nŭih geh kan pah…Mhe aơ, tâm rơh rƀŭn tal 3 Rnâng kan rđau Đảng bộ n’gor gưl XVI, n’gor Kon Tum rgum tâm nchră nau kan ndâk njêng ƀon lan mhe. Ntoh nau ta nar rƀŭn, wa Dương Văn Trang, uỷ viên Trung ương Đảng, Bí thư n’gor uỷ Kon Tum mbơh:

  ‘Rnâng kan rđau kan n’gor uỷ hŏ rđau đă kơp, uănh kloh nau tă geh dơi, nau ê dơi, nau jêr kol tâm nau ndâk njêng ƀon lan mhe tâm n’gor. Uănh kloh nkô̆ nau ngăn ndrel nkô̆ nau ƀư jêng ê geh nau dơi kol. Nsing tâm nau kan ngăn bah n’gor, ăp nau rđau kan bah Trung ương mpeh nau ndâk njêng ƀon lan mhe gay uănh năl nkô̆, nau kan, ntrong kan ngăn gay ndâk njêng ƀon lan mhe tâm n’gor lvang năm 2021-2025”.

Gay ƀư jêh nau kan geh dơi nkô̆ nau tât năm 2025 geh 4 nkuăl ndrel nkuăl ƀon têh geh dơi ƀon lan mhe mô lah jêh nau dơi ndâk njêng ƀon lan mhe, n’gor Kon Tum uănh năl gay geh ntrŭnh, ƀư 8 rmôt nau kan, ntỏng kan, geh: N’hao nau kan nkoch trêng mpeh nau ndâk njêng ƀon lan mhe, n’hao nau nâp nau rgum, mât nau kan nkoch trêng mpeh nau ƀon lan mhe, n’hao nau rgum, mât ndrel ƀư ueh ngăn mpeh nau hun hao tuch tăm, ƀon lan, ntih kơl ndâk ngih vâl gung trong, văng sa rêh jêng ƀon lan geh nsum ma nau hun hao, ndâk nau kan tuch tăm n’hao nau geh ân ƀon lan, hun hao ntĭm nti, dak si, văn hoá, mât ntŭk ntu gŭ âm, n’hao nau ƀư nâp nau kan bah Đảng ndrel ntrong kan chính trị tâm dâng, âk ntil nau ntuh kơl ndâk njêng ƀon lan mhe, n’hao nau rđau kan bah ăp gưl uỷ đảng, mât nau rđau kan bah UBND ăp gưl ndrel ƀư rgum n’hâm dăng bah ăp rmôt kan chính trị-rêh jêng tâm ƀon lan tâm nau ndâk njêng ƀon lan mhe.

Jêh lôch sa tết năm mhe Tân Sửu 2021, dĭng lĕ 10 nkuăl, nkuăl ƀon têh bah n’gor Kon Tum ntơm hăn leo nŭih kan bôk năp rgŏ jă ƀon lan tâm rnglăp ndâk n’hâm ndâk njêng ƀon lan mhe ndrel đô thị mhe. Ta nkuăl ƀon têh Kon Tum, n’gâng kan ndrel ƀon lan 21 xã, phường hŏ ntơm ƀư nau tăm tơm si bôk năm nsôih tăm tâm năm geh đê̆ ngăm 2000 tơm si, nkra bê tông ăp trong hăn ƀon lan, ntơm rep kloh ntŭk ntu trong têh.

Wa Nguyễn Thanh Mẫn, Kruanh UBND nkuăl ƀon têh Kon Tum mbơh, năm aơ nkuăl ƀon têh nsôih mra geh tay 2 xã Chư Hreng ndrel Kroong jêh lor nau dơi ƀon lan mhe. Tât năm 2023 nkuăl ƀon têh mra geh tŏng dơi ƀon lan mhe ndrel geh đô thị loại II bah năp năm 2025, N’gâng kan hŏ jao nau kan ngăn tâm ăp xã, phường, ntŭk kan gay đăp mpăn ân nŭih ƀư nau dơi săk tam, ngăn:

  ‘Đah ăp xã ntơm ndâk ƀư trong hăn ƀon lan, ndâk ƀư ăp ntŭk kan tâm nkuăl rƀŏng tât ndâk njêng ăp nau dơi gay tŏng geh nau dơi kơp- dơn ƀon lan mhe. Đah ăp phường ân ndâk tay nau đăp mpăn, ƀư nau kan kí ton đah ăp rnăk ƀon lan mât ngh vâl, gung trong, nau kan, mât ueh ân tơm tăm ueh. Ndrel đah nê UBND nkuăl ƀon nê mra ƀư ân ueh tay trong hăn ngăn lah nkra ân nâp pĭt meng trong, trong hoch dak, tơm si rih, điện gay ƀư ueh ăp trong hăn tơm bah nkuăl ƀon têh. Rƀŏng tât ndâk njêng nkuăl ƀon têh Kon Tum geh đô thị loại II, nkuăl ƀon têh mra ntrŭnh nau kan tơm gay ma pơk hvi ân ntŭk ƀon têh ueh”.

Ndrel ma nau kan nsum, n’gâng kan ăp xã, nkuăl bah n’gor Kon Tum nsing tâm nau ngăn bah nkuăl geh geh nau kan êng, gay mât ân nâp ndrel n’hao nau rjăp đah ăp nau kan ƀon lan mhe ngăn. Wa Nguyễn Văn Thuỷ, Groi Kruanh UBND nkuăl Kon Rẫy, mbơh:

  ‘Tâm âk nau kan ri nau tơm khlay nê lah nau bonh đă ƀon lan mât ân dŏng dơi ăp nau kan mhe tâm nau tuch tăm gay njêng âk nau khlay, nau geh ueh âk lơn tâm ndrel du rnoh neh tăm gay ma pă nau geh tay ân rnăk vâl ndrel ma rklaih ach o nâp. Ngăn nê lah leo ăp kon ntil, mpa rong mhe geh nau nâp, geh săk rnglay văng sa âk kơt tĭng tâm nau tuch tăm đah ăp ntil tơm tăm gay njêng geh dơi âk lơn, rklaih dơi nau kan mpeh nau geh jêng bah ƀon lan”.

Gay lŏ mât ân nâp, n’hao dơi nau kan, n’gâng kan bah 28 xã tŏng geh nau dơi ƀon lan mhe bah n’gor lŏ ntrŭt dăng nau kan nkoch trêng ndâk njêng ƀon lan mhe, mât ân săk tam nau kan tâm rlong “Kon Tum nsum n’hâm ndâk njêng ƀon lan mhe”, rgum dĭng ân ueh ăp tơm nau kan gay ma mât ân nâp, ueh ndrel n’hao nau dơi geh bah ăp nkô̆ nau nchrăp./.

Nŭih rblang: H’Thi