VOV4.M’nông: Ta n’gor Kon Tum tât aƀaơ lĕ kơp dơn bơi 30 nuĭh ntưp Covid-19. Yơn lah lĕ rngôch ăp nuĭh dơi nkhah êng dâl rnôk sĭt n’gor n’hanh Kon Tum aƀaơ lah ntŭk ta nkual Tây Nguyên mô hŏ geh nuĭh ntưp tâm ntŭk gŭ rêh. N’hêl na nê̆ trong kan njrăng, n’gang srê Covid-19 ta n’gor Kon Tum an saơ, ndrel đah ntŭk kâp njrăng tam tu tơm ntưp ta mpông luh lăp n’gor ri trong kan njrăng n’gang srê ta ăp ƀon lan dôl rgop khlay tâm nău nking n’gang tu tơm ntưp tâm ntŭk gŭ rêh.

          Dŭt khay 8 mhe rlău, xă Hơ Moong, nkuăl Sa Thầy geh 16 nuĭh pah kan plơ̆ sĭt bah nkual srê n’gor Bình Dương. Jêh rnôk lôch 14 nar nkhah êng rgum ta n’gor tĭng nău ntrŭnh, bôl dŭt nkah gĭt oh kon, yơn âk rnăk geh nsum nău dăn đă đah n’gâng kan ƀon lan an nuĭh bên bah nơm dơi nkhah rgum tay 14 nar ta xă, gay “lah geh nău” ri mô khuch tât ntŭk gŭ rêh.

Wa A Đứu, Bí thư Chi bộ ƀon Kà Bầy an gĭt, gay nuĭh ƀon lan wât njrăng n’gang srê uĕh kơt nĕ, ăp nar 4 đảng viên bah Chi bộ tâm ndơn kâp ta ntŭk kâp njrăng uănh nđôi srê Covid-19 yor xă ndâk ƀư ta trong hăn tâm ƀon. Ta aơ geh rnôk nuĭh ƀon lan hăn tâm mir mô lah tâm lŏ plơ̆ sĭt ăp đảng viên ndăn gĭt nu nău nkra njêng tuch tăm n’hanh săk soan tĭng nuĭh ƀon lan. Ndrel đah nĕ blău nkoch trêng mbơh njrăng n’gang srê Covid-19 gay nuĭh ƀon lan wât đah nău klach bah chôt srê đah săk soan bah săk nơm n’hanh ƀon lan. Rlău ma ndăn ơm ôi, măng ngo, ăp đảng viên tât tĭng rnăk tâm ƀon ntĭm, nkoch trêng, rgŏ jă nuĭh ƀon lan ăp trong njrăng n’gang srê:

           Đảng viên tâm Chi bộ thôn ƀư tĭng uĕh nău ntĭm rđău bah gưl ka lơ. Trong kan njrăng n’gang srê kơt aƀaơ khân pơng kâp, rgŏ jă kônh wa wăn bok put mbung rnôk hăn bah dih. Đảng viên tâm Chi bộ ntrong leo lor tâm ăp nău kan rgŏ jă kônh wa ndrel râng”.

Uănh nđôi nuĭh lăp ta ntŭk uănh nđôi chôt srê Covid-19 ta ƀon Kà Bầy, xă Hơ Moong.

          Gay njrăng n’gang srê Covid-19, xă Hơ Moong, nkuăl Sa Thầy ndâk ƀư 2 ntŭk uănh nđôi nuĭh lăp tâm ƀon bah nkuăl Đăk Tô n’hanh Đăk Hà. Rmôt tât pah kan ta Ntŭk kâp ndrel đah cán bộ bah xă hôm geh tât râng bah ăp druh ndăm rmôt pah kan ntŭk gŭ rêh njrăng, n’gang srê Covid-19 2 ƀon ntŭk gŭ kâp njrăng. Rnoh mrô uănh nđôi ta 2 ntŭk uănh nđôi srê bah xă an saơ, bah n’gul khay 5 tât khay 9 geh rlău 4.600 nuĭh lăp tâm ntŭk dŭt âk bah xă Đăk Mar, nkuăl Đăk Hà n’hanh xă Pô Kô, nkuăl Đăk Tô. Nău mbơh tĭng nuĭh dơi nchih tŏng ăp ngăn lah sĭt ntŭk gŭ rêh, mrô điện thoại ôp nău n’hanh uănh duh săk rnôk rlău ntŭk kâp njrăng. Wa Lê Khắc Tuấn, Bí thư Đảng ủy xă Hơ Moong an gĭt, gay n’hao săk rnglăy trong kan njrăng n’gang Covid-19, ndrel đah mât rjăp nău kan 2 ntŭk uănh nđôi n’ăp măng nar, n’gâng kan xă an n’hao nău wât njrăng n’gang srê bah nuĭh ƀon lan:

          Xă Hơ Moong ƀon lan rnoi đêt geh rlău 90% jêng lah trong kan nkoch trêng dŭt hvi. Tâm 1 mông tât 2 mông pơk Radio nkoch trêng na nao. Hôm ta ăp thôn geh loa ty xă pă, Ban Nhân dân thôn djôt loa mbơh na nao. Tât aƀaơ nău wât tâm ƀon lan dŭt âk.

Nuĭh ƀon lan hăn ƀư mir lor rnôk sĭt tâm ƀon dơi uănh nđôi duh săk ta Ntŭk uănh nđôi srê Covid-19.

          Hăn ndrel đah rmôt nai dak si, tahen, công an ta ntŭk bôk trong rlong sial njrăng n’gang srê, tât aƀaơ ta ăp ƀon lan, tổ dân phố bah n’gor Kon Tum lĕ ndâk njêng rlău 2.800 Rmôt pah kan njrăng n’gang srê Covid-19. Du rmôt pah kan geh bah 2 tât 3 druh ndăm lah cán bộ thôn, ƀon, tổ dân phố, ăp nsum mpôl, nuĭh kơl kan n’hanh geh lĕ đah nău kan bah 30 tât 50 rnăk. Wa Y Dim, Groi Bí thư rnâng kan Đảng ủy, Kruanh HĐND xă Đăk Pxi, nkuăl Đăk Hà an gĭt, nău dơi mât ƀư tơm bah ăp rmôt pah kan nsum mpôl tâm trong kan njrăng n’gang srê Covid-19 ta ăp ƀon lan lah dŭt khlay:

 Ăp rmôt njrăng n’gang srê ăp nar geh nău kan hăn groi nđôi lĕ rngôch ăp thôn ta lam xă. Ăp rmôt tâm rgop đah Công an kâp uănh nđôi nău hăn trong mô wăn bok put mbung. Groi nđôi rjăp ăp nuĭh ƀon lan ta bah dih n’gor sĭt jay. Mât uănh rjăp tĭng nău ntrŭnh mpeh nkhah êng. Đah thôn uănh nđôi mô geh rgum âk nuĭh rlău ma nĕ ntĭm an kônh wa răk rao ntŭk ntô kloh uĕh. Ta jay geh dak puh rao kaman. Kônh wa mô geh ndơ rwăt dak puh rao kaman ri mpôl hên ntĭm an kônh wa rwăt sa ƀu ƀa ƀơ rao ty đah sa ƀu jêh nĕ ntĭm wăn bok put mbung ntĭm na nê̆.

      Du rnăk ta ƀon Plei Rơ Hai II, phường Lê Lợi, nkual ƀon têh Kon Tum ƀư nkhah êng dak si ta jay njrăng n’gang srê Covid-19.

Tât aƀaơ ta n’gor Kon Tum, lĕ rngôch ăp nuĭh ntưp Covid-19 dơi nkhah êng dâl rnôk sĭt n’gor n’hanh Kon Tum aƀaơ lah ntŭk ngoay dơm ta nkual Tây Nguyên mô hŏ geh nuĭh ntưp tâm ntŭk gŭ rêh. Gay mât nâp săk rnglăy uănh nđôi srê, ndrel đah n’hao rmôt kan an ăp ntŭk uănh nđôi ta mpông luh lăp tâm n’gor gay nking n’gang tu tơm ntưp lăp tâm n’gor, Kon Tum dôl mât uĕh n’hanh ndâk njêng tay âk ƀon lan đăp mpăn gay nău rêh plơ̆ tay nu nău nâm ơm mhe.

                    Nuĭh rblang: Y Sưng Phê Ja