VOV4.M'nông: Ôi 6/12, Nhih dak si n'gor Kon Tum mbơh đah báo chí mpeh 8 nuĭh ntưp Covid-19 dơi năl saơ ta nhih dak si ntơm bah nar 2- 4/12. Tĭng nê tâm 8 nuĭh F0 geh 2 hê nuĭh lah nuĭh kan dak si, lah 1 hê bác sỹ n'hanh 1 hê nuĭh kan điều dưỡng. Prao nuĭh F0 hôm ƀa ƀă, lah: 3 nuĭh jay gŭ ta nkual ƀon têh Kon Tum, nkuâl Sa Thầy n'hanh Kon Rẫy; 1 hê bu ur bŭn n'hanh rnăk nuĭh bu ur bŭn ta nkuâl Đăk Hà n'hanh 1 hê nuĭh rnăk wâl bah nuĭh ji ta nkuâl  Sa Thầy.

Lĕ rngôch ăp nuĭh F0 dơi năl ntưp ta nhih dak si n'gor Kon Tum hŏ njŭn tât ntŭk an gŭ săm êng ta Nhih dak si manh ntăm ƀư mbrô 1 n'gor Kon Tum. Lôch rnôk năl geh 8 F0, Nhih dak si n'gor Kon Tum ƀoi tĭng têl, an gŭ rgum êng ăp nuĭh F1, F2; ƀư jut kloh rao puh nkhĭt kaman ăp khoa geh nuĭh ntưp Covid-19; tĭng ƀư lhăt pah kan mât njrăng nuĭh gŭ mât chăm luh lăp nhih dak si; way mât kân ntưp rêng đah nuĭh ji, nuĭh hăn mât chăm n'hanh lĕ rngôch ăp nuĭh kan dak si./.

Nuĭh rblang: Điểu Thân