VOV4.M’nông:  Aƀaơ hin, nuĭh tăm sầu riêng ta nkuăl Krông Pač, n’gor Dak Lak lĕ tâm yan play dŭm. Sầu riêng dơi săk play yơn rnoh khlay jŭr thuk hô ngăn, ƀư nuĭh ƀon lan tăm sầu riêng rngot rngăt.

Wa Tạ Văn Châm, groi Kruanh UBND xă Ea Yông an an gĭt: Lam xă geh 2.000ha sầu riêng, tâm nĕ geh 1 rbăn ha lĕ geh play dŭm. Rnoh ndơ yan aơ nchrăp geh rlău 20 rbăn tấn, geh n’gul rnoh sầu riêng bah lam nkuăl. Bah năp đaơ geh năm sầu riêng Dona hao tât 80 rbăn prăk/kg, năm e geh ta rnoh 40 tât 45 rbăn prăk. Năm aơ bôk yan, sầu riêng J6 tăch geh rnoh khlay rlău 30 rbăn prăk. Aƀaơ sầu riêng Dona lĕ dŭm hô ma nuĭh rwăt lŏ mô ŭch. Đê̆ đŏng du đêt nuĭh tơm mir lĕ nchăm rnoh khlay rlău 40 rbăn prăk, yơn aƀaơ hin an jŭr 25 rbăn, đê̆ đŏng đêt lơn mư dơi tăch.

Nuĭh tăm sầu riêng Krông Pač dôl rgum rgum dônh.

“Aƀaơ hin sầu riêng ntơm tâm yan pĕ dŭm hôm yơn yor chôt srê Covid-19 jêng ntŭk tăch sầu riêng bah kônh wa ƀon lan xă Ea Yông dŭt jêr jŏt yor mô dơi hăn luh dak bah dih. Nuĭh rwăt mô ŭch rwăt, mô lah rwăt đêt. Rnoh khlay aƀaơ ri geh bah 18 tât 25 rbăn prăk, tĭng ndơ uĕh”.

Tĭng mĭn kơp bah wa Y Ngắc Niê, Kruanh Rmôt nuĭh ƀon lan pah kan lŏ mir xă Ea Yông ri năm aơ, ƀon lan tâm xă lĕ roh rlău 400 rmen prăk, yor rnoh tăch sầu riêng Dona knŭng geh n’gul đah rnoh năm e.

“Sầu riêng bah kônh wa rnôk aơ lĕ tŏng năm, dŭm n’hanh rŭng, rnoh khlay aƀaơ ri jŭr mro, jŭr na nao. Tât rnôk aƀaơ ri geh bah 20 tât 25 rbăn prăk/kg”.

Mpôl hên tât mir bah wa Y Suông Niê ta ƀon Jung. ta aơ rlău 10 nuĭh dôl dônh sầu riêng, nchoăn an tâm ndeh kay gay rdêng hăn ntŭk rgum tăch. Wa Y Suông an gĭt rnăk wâl lĕ tăch 7 tấn, êng nar năng aơ geh 2 tấn. Rnoh khlay sầu riêng ta mir dơi rlak 3 ntil, đêt ngăn lah 18 rbăn, 22 rbăn, n’hanh 25 rbăn prăk.

Âk doanh nghiệp rgum rwăt ntuh kơl ndơ nkret njêng jru, n’hanh mât prăp sầu riêng đah ntŭk prăp nđik gay tăch n’gluh.

Mpôl hên tât Công ty Cổ phần TM Xuất nhập khẩu Dũng Thái Sơn ta thôn 4 xă Ea Kênh. Aơ lah công ty rgum rwăt sầu riêng têh ngăn ta nkuăl Krông Pač. Wa Lê Viết Chiến groi kruanh công ty nkoch: Knơm dăch aơ Công ty lĕ ntuh kơl gay ndâk njêng tay ƀư ntŭk prăp nđik jêng du nar dơi nkret njêng rlău 20 tấn lĕ jêng ndơ. Công ty dôl nsrôih rgum rwăt ndơ an nuĭh ƀon lan. Yơn yor srê Covid-19, nău rdêng, tăch n’gluh dŭt jêr jŏt. Wa Chiến an gĭt aƀaơ ta công ty mô hŏ dơi tăch n’gluh kơt ăp năm, ndơ knŭng lah rdêng sĭt tăch ta nkual ƀon têh Hồ Chí Minh n’hanh ăp n’gor miền Tây Nam Bộ, jêng rnoh rgum rwăt ăp ntŭk hŭch đŏng, knŭng geh nklăp 7.500 tấn, đah tâm ban n’gul năm bah năp.

“Nchăp công ty nchrăp rgum rwăt nkret njêng 15.000 tấn play. Yơn yor srê, yor nău tăch mbrơi, rdêng mbrơi, ntop tay lah geh nău n’hŭch. Yor nê nchrăp săk geh dơi ƀư nklăp 50% trong nchrăp bôk năp”./.