VOV4.M'nông: Kruanh dak Nguyễn Xuân Phúc mhe geh kuăl điện tâm nchră đah Tổng thống Liên bang Nga Vladimir Putin. Bar kruanh hŏ tâm ôp mpeh ăp trong rƀŏng, trong nkra n'hao dăng lơn đŏng tâm boh têh dơi jŏ jong lam lĕ rngôch Việt Nam- Nga, tâm boh rdâng lơh nuh srê Covid-19, tâm ban kơt ăp nkô̆ nău tâm nkual n'hanh dak bah dih bar dak ndrel uănh khlay.

Kruanh dak Nguyễn Xuân Phúc lah rjăp Việt Nam năp kơi tâm ban ngoăy uănh khlay tâm boh tâm rnglăp way ơm n'hanh tâm boh têh dơi jŏ jong lam lĕ rngôch đah Liên bang Nga; ŭch rŏng n'hao dăng tâm boh đah bar dak lam ntŭr neh ta lĕ rngôch ăp trong kan, yor ma nău geh nsum bah bar rnoi nuĭh. Mpeh tâm boh Việt Nam – Liên bang Nga, Kruanh dak Nguyễn Xuân Phúc n'hanh Tổng thống Putin mpơl nău rhơn ta năp ăp nău dơi hŏ geh tâm boh bar ding tâm bah ri aơ nơh. Bar kruanh rđău kan tâm ôp mpeh ăp nkô̆ nău dak bah dih n'hanh ta nkual ndrel uănh khlay đŏng, lah rjăp tâm boh kan nsum tay lhăt n'hanh geh nău dơi tam ta ăp tơ̆ rgum nchră ta nkual, tâm nê tâm ban ŭch nkra ăp nău tâm pit ta dak lêng ma trong đăp mpăn./.

Nuĭh rblang: Điểu Thân