VOV4.M'nông: Nkhêp nkah ndray 31 năm Nar lam ntŭr neh nuĭh âk năm deh (1/10, Kruanh dak Nguyễn Xuân Phúc mhe geh rơh mâp măt Trung ương Hội nuĭh âk năm deh Việt Nam n'hanh ăp nuĭh ntơh măt nuĭh âk năm deh. Ntơh măt kruanh rđău kan Đảng, Ngih dak, Kruanh dak Nguyễn Xuân Phúc njuăl tât ăp cán bộ, hội viên Hội nuĭh âk năm deh Việt Nam, lĕ rngôch nuĭh âk năm deh Việt Nam tâm n'hanh bah dih dak nău chop khâl dêh bên n'hanh nău mbah rhơn dŭt jru hvi.

Tâm let năp tay, Kruanh dak dăn đă Hội nuĭh âk năm deh Việt Nam ân kan nsum đah ăp n'gâng kan, ăp n'gor tĭng ƀư tay n'hanh nsŏng kơl rdâk njêng trong nchrăp, trong kơl bah Đảng, Ngih dak mpeh mât chăm n'hâm suan nuĭh âk năm deh uĕh lơn. Lah rjăp nuĭh âk năm deh lah n'gu tơm bah rnăk wâl, Kruanh dak dăn đă nuĭh âk năm deh tât tay ăp nău lư mpeh trong nchrăp, gung trong, trong kơl bah Đảng n'hanh Ngih dak; gŭ mĭn tay, kơp lĕ ma kơt nti, gay ntơm bah nê ntĭm nti tay rơh kơn mom ndăm mpeh ăp ntil, geh nuih n'hâm uĕh, trong gŭ rêh têh uĕh, mât ndray n'hanh mpư n'hao nău way ơm uĕh lăng văn hoá bah rnoi nuĭh he./.

Nuĭh rblang: Điểu Thân