VOV4.M'nông: Tâm rnôk hăn khâl ngăn Việt Nam, ôi 25/8, Kruanh dak Nguyễn Xuân Phúc hŏ geh rơh ôp srĭng nău đah Groi Tổng thống Hoa Kỳ Kamala Harris. Ta rơh ôp srĭng nău, Kruanh dak Nguyễn Xuân Phúc lah rjăp, Việt Nam du trong tĭng ƀư tâm boh dak bah dih êng nơm, ƀư tơm êng n'hanh lah băl tâm boh nsing nơm, rgop uĕh tâm nău đăp mpăn n'hanh hun hao lam ntŭr neh.

Nsing kalơ nê, Việt Nam way uănh Mỹ lah ngoăy tâm ăp dak băl tâm boh dâk bôk năp. Việt Nam ŭch rŏng Mỹ n'hao dăng tay tâm boh lam lĕ rngôch, nar lơn ma jăp jru, ndrel nsĭt geh kalơ nău way uănh khlay ƀư tơm, lam lĕ rngôch neh dak n'hanh nău way kan nsum. Groi Tổng thống Mỹ - Kamala Harris rnê âk Việt Nam hŏ nsrôih mât kân nuh srê Covid-19 n'hanh lah rjăp tay nău ton bah Mỹ, ntop kơl Việt Nam ntrôl rŭch nuh srê Covid-19. Bar kruanh rđău kan tâm ban ŭch n'hao dăng tâm boh n'hanh ntrôl dăng tâm boh kalơ âk trong kan. Lơn lah tâm boh wăng sa tăch rgâl, rnă njrăng neh dak, ƀư bah khuch khat an tay bah kơi tâm lơh tâm su, dak si, công nghệ...

Nuĭh rblang: Điểu Thân