VOV4.M'nông: Tâm rnôk râng tâm nchră Đại hội đồng Liên hợp quốc tâl 76, nar 21/9 Kruanh dak Nguyễn Xuân Phúc hŏ geh bar rơh ôp srĭng nău khlay đah wa Abdulla Shahid, Kruanh Đại hội đồng, n'hanh wa Antonio Guterres, Tổng Thư ký Liên hợp quốc. Ta ăp rơh ôp srĭng nău, Kruanh dak Nguyễn Xuân Phúc lah rjăp Việt Nam uănh khlay n'hanh tĭng kơl nău ƀư tơm khlay bah Liên hợp quốc tâm trong kan mât njrăng lam ntŭr neh gay rdâng lơh đah ntul rlong nsum dŭt têh kuâng aƀaơ n'hanh ŭch rŏng ntrŭt ntrôl tâm boh lam lĕ rngôch đah Liên hợp quốc. Kruanh dak an gĭt Việt Nam dôl rgum lĕ ăp tơm ndơ tâm rơh rdâng lơh COVID-19 dôl tât dŭt krit nji, ndơ̆ đăp mpăn, ngăch dăng n'hâm suan ƀon lan dâk lor bôk năp, nkre lah uĕh bôk nău kan COVAX n'hanh ăp mpôl kan bah Liên hợp quốc hŏ ntop kơl vaccine, ndơ dŏng kan dak si n'hanh mbơh nti trong kan mpeh njrăng n'gang nuh srê n'hanh dâk hao tay lôch bah nuh srê, dăn đă Liên hợp quốc ntop kơl tay Việt Nam tâm let năp tay, lơn lah gay ntop kơl an ƀư chuh n'gang vaccine lam hvi an nuĭh ƀon lan./.  

Nuĭh rblang: Điểu Thân