VOV4.M'nông: Lôch jêh hăn khâl uĕh lăng bah hăn khâl tâm rnglăp ngăn Cuba, kêng măng 20/9 tĭng mông ta ntŭk, ơm ôi aơ tĭng mông Việt Nam, Kruanh dak Nguyễn Xuân Phúc hăn khâl tât Hoa Kỳ, râng Tâm nchră nsum gưl têh tâl 76 Đại hội đồng Liên Hợp Quốc n'hanh tĭng ƀư du đêt nău kan bar ding ta Hoa Kỳ. Nău kan khlay dja gay an ƀư gung trong tâm boh dak bah dih Đại hội Đảng lam dak tâl XIII ndơ̆ luh; ntrôl dăng n'hanh n'hao têh tâm boh dak bah dih âk ding bah Việt Nam tât năm 2030; mpơl nău khlay, ntŭk gŭ kan lah dak lăp kan nsum geh nău dơn kan n'hanh nău rgop ngăn ngăn tâm ăp nău kan bah Liên Hợp Quốc n'hanh nsum mpôl lam ntŭr neh. Đah nău tât râng na nê̆ bah rlău 100 kruanh mât bôk neh dak, kruanh rđău kan gưl têh, Đại hội đồng Liên Hợp Quốc tâl 76 lah rnôk uĕh gay ƀư ăp rơh mâp bar ding đah kruanh rđău kan ăp dak lôch jŏ năm mô dơi mâp na nê̆ tă bah nuh srê Covid-19. Kruanh dak Nguyễn Xuân Phúc hôm geh ăp nău kan bar ding ta Liên Hợp Quốc n'hanh Hoa Kỳ đŏng, gay n'hao dăng tâm boh bah he đah n'gâng kan ăp dak n'hanh n'gâng kan mhe bah Hoa Kỳ; ntrŭt ntrôl tâm boh têh jong lam lĕ rngôch dôl hun hao uĕh lăng; tâm di đah rnoh tât kan nsum, nău geh nsum bah bar dak Việt Nam – Hoa Kỳ.

Nuĭh rblang: Điểu Thân