VOV4.Mnông-  Hăn khâl ta Cuba, nar naơ, 19/9, ta thủ đô La Habana, Cuba, kruanh dak Nguyễn Xuân Phúc lĕ tâm nchră đah Thủ tướng Cuba Manuel Marrero Cruz n’hanh nuĭh leo kan âk n’gâng kan, ntŭk kan Cuba.

Ta rơh tâm nchră, kruanh dak Nguyễn Xuân Phúc knơm an lah đah nău leo kan bâh Thủ tướng Manuel Marero Cruz, chính phủ Cuba mbra geh âk nău dơi mhe tâm nău leo kan ngih dak n’hanh n’gâng kan wăng sa. Bar ding lĕ rlet rlău âk nău ntul rlong, mât ueh ăp rơh tâm nchră gâl têh n’hanh nău tâm kơl đah lĕ rngôch ăp ntrong kan, ngăch ndăn kơl nsum tâm rdâng đah nuh srê Covid-19, mpơl nău rŏng dêh dăch ngăn, tâm rnglăp oh nô n’hanh tâm kơl ndrel. Kruanh dak Nguyễn Xuân Phúc ŭch Chính phủ bar dak tâm rgop na nê̆, mbơh tơih geh săk rnglăy ăp nău tâm ton gâl têh, ăp ntrong kan tâm kơl ơm geh, ngăn lah n’hao săk rnglăy nău pah kan bâh Ủy ban bar chính phủ, ntop ndơ̆ nău tâm boh bar dak lơ ma hun hao ngăn ngên, n’hao nău tâm kơl, tăch rgâl n’hanh ntuh kơl an tâm di đah nău tâm boh kan chính trịh ueh đah bar dak.

Nuĭh rblang: Thị Đoắt