VOV4.M’nông: Lơ 22/8, Uỷ viên Bộ chính trị, Kruanh dak Việt Nam Nguyễn Xuân Phúc hŏ leo bôk rmôt kan rđau kan Đảng, Ngih dak, MTTQ Việt Nam tât mpoh kthup, nkah Đại tướng Võ Nguyên Giáp, di nkah 110 năm nar deh bah Đại tướng (25/8/1911-25/8/2021). Đại tướng lah nŭih kon se nti blau ngăn ndrel tâm dăch ngăn bah Kruanh Hồ Chí Minh. lôch nau rêh nơm, Đại tướng tâm dăch ma nau kan cách mạng bah Đảng ndrel rnoi mpôl.

Đại tướng Võ Nguyên Giáp mro ang ueh rup gui ueh bah tahen cách mạng nâp dăng, mro nsôih ƀư nau kan bah cách mạng bah Đảng. Đại tướng Võ Nguyên Giáp hôm lah nŭih khĭt blau, hŏ ndrel lam Đảng, lam ƀon lan, lam tahen nơm hăn ntơm nau dơi aơ ân tât nau dơi êng, ndâk ăp nau têh dăng ueh lăng. Đại tướng Võ Nguyên Giáp lah nŭih blau bôk năp mpeh ntrong tâm lơh bah ƀon lan ndrel rmôt kan rklaih đăp mpăn rnoi mpôl tâm dak ndrel lam ntur neh./.

Nŭih rblang: H’Thi