VOV4.M’nông – Nkhêp di, Đại hội đồng Liên nghị viện ăp dak ASEAN rơh tal 42 (AIPA-42) lĕ na nê̆ ntơm ƀư tĭng trong pơk sŏng dăng, ndơn măt kruanh dak n’hanh nuĭh ƀơn lan Việt Nam, kruanh dak Nguyễn Xuân Phúc lĕ geh nău mbơh mbah rhơn njuăl tât Đại hội đồng AIPA-42.

Kruanh dak njuăl nău mbơh mbah rhơn Đại hội đồng AIPA-42

Kruanh dak lah rjăp, Đại hội đồng AIPA-42 dơi ƀư tâm rnôk lam ntŭr neh n’hanh nkual geh khuch hô bah srê Covid-19, khuch hô tât hun hao wăng sa-rêh jêng n’hanh nău rêh nuĭh ƀon lan ta ăp dak. Tâm lvang jêr jŏt, ntul rlong aƀaơ, Kruanh dak lah rjăp nău khlay bah kênh ndâk njêng pháp luật ăp dak ASEAN, mbơh an AIPA n’hanh ăp Nghị viện kơt du n’gâng tơm tâm rgop uĕh n’hanh ntop kơl săk rnglăy an nău nsrôih bah ăp chính phủ nâp nâl soan dăng lĕ rngôch ASEAN rlet rlău jêr jŏt, ƀư tĭng lôch uĕh tay ăp nău rƀŏng ndâk njêng nsum mpôl.

Nŭih rblang: Y Sưng Phê Ja