VOV4.M'nông: Ôi 18/8, Kruanh dak Nguyễn Xuân Phúc ƀư tơm rơh pah kan đah kruanh rđău kan n'gâng tơm bah n'gor mpeh nô nău tĭng ƀư nău kan wăng sa- rêh jêng kon nuĭh. Lah ta rơh pah kan, Kruanh dak Nguyễn Xuân Phúc rnê âk Đảng bộ, n'gâng kan n'hanh ƀon lan n'gor Bắc Giang hŏ geh âk trong nkra rdâng lơh nuh srê lĕ n'hâm suan, geh nău tam, âk rnoh tât kan. Yor kơt nê̆ rlău 2 khay rdâng lơh nuh srê geh nău dơi, 36 nar rlău aơ Bắc Giang hŏ mô ntoh nuĭh ji mhe. Khuh n'gôr rdâk tay nău kan ƀư njêng tăch rgâl.

Aơ lah nău dơi dŭt ngăch prăl, rgop tâm nău dơi nsum bah lam dak n'hanh lah nău tă ơm gĭt kan uĕh đah âk n'gor tâm lam dak. Na nê̆, n'gor hŏ nking nchăng geh nău tam nuh srê lăp tâm 4 nkual công nghiệp têh. Ta nklang nuh srê, Bắc Giang hôm ƀư geh nău dơi bầu cử Đại biểu Quốc hội n'hanh Hội Đồng nhân dân ăp gưl. Ndrel đah nê, n'gor hŏ geh nău dơi uĕh mpeh wăng sa tâm ban kơt tăch n'gluh, sŏk geh ngân sách đŏng. Nkhêp geh rnôk dja, ntơh măt kruanh rđău kan Đảng, Ngih dak, Kruanh dak Nguyễn Xuân Phúc hŏ ntăm an Huân chương Lao động hạng Ba an Đảng bộ, n'gâng kan n'hanh ƀon lan n'gor Bắc Giang mpeh ăp nău dơi dŭt ngăch prăl tâm pah kan njrăng, n'gang nuh srê COVID-19./.

Nuĭh rblang: Điểu Thân