VOV4.M’nông – Mpôl ntoh măt gưl prêh Việt Nam yor Kruanh dak Nguyễn Xuân Phúc leo bôk lĕ râng rơh tâm nchră nsum gưl prêh năm rƀŭn tal 76 Đại hội đồng Liên hợp quốc. Ôi 21/9, tĭng mông New York, ta Ngih pah kan Liên hợp quốc ta nkual ƀon têh New York, Hoa Kỳ, Rơh tâm nchră nsum gưl prêh năm rƀŭn tal 76 Đại hội đồng Liên hợp quốc lĕ ntơm ƀư đah bôk nău “Ndrel nsing nơm n’hanh hun hao êng-Rƀŏng tât rdâk hao jêh Covid-19, ndâk njêng tay nâp nâl, mât njrăng play neh, ntrôl nău dơi kon nuĭh n’hanh rgâl mât uănh Liên hợp quốc”. Ntoh ngơi ta rơh ntơm ƀư, wa Abdulla Shahid, Kruanh Đại hội đồng Liên hợp quốc năm kan 76 ton mbra ntrôl kan ndrel lam ntŭr neh gay rdâng đah chôt srê Covid-19, rdâk hao n’hanh hun hao jêh srê tĭng trong nâp nâl, nsing tâm Bôk nău kan khlay tât năm 2030 yor nău hun hao nâp nâl. Rơh tâm nchră nsum gưl prêh mbra ƀư tât nar 27/9, n’hanh tĭng bôk nău kan, Kruanh dak Nguyễn Xuân Phúc mbra geh nău ntoh ngơi khlay ta kêng măng nar 22/9 mông New York.

Nuĭh rblang: Y Sưng Phê Ja