VOV4.M’nông: Lơ 11/10, Đại tướng Tô Lâm, Kruanh n’gâng kan Công an hŏ geh rơh tâm mâp trực tuyến đah wa Josephine Teo, Kruanh N’gâng kan nkoch mbơh nau nkre Kruanh n’gâng kan ƀư nau rnă njrăng mạng Singapore. Kruanh n’gâng kan Tô Lâm lah kloh, nau tâm boh kan nsum Việt Nam-Singapore rơh rlau aơ mô nsrŭng mât nâp ndrel hun hao tâm âk nau kan. Nau tâm boh kan nsum đah N’gâng kan Công an Việt Nam đah ăp ntŭk kan ƀư tĭng pháp luật Singapore lŏ geh mât nâp ndrel hun hao.

N’gâng kan công an Việt Nam ndrel ăp ntŭk kan n’gâng kan Singapore hŏ ăp nhoat pơk hvi nau tâm boh kan nsum, tâm rgâl nau kan đah ăp n’gâng kan bah 2 ing gay tâm nchră mpeh nau tâm boh mpeh nau kan rnă njrăng mạng ndrel nau njrăng, rdâng phung tih dôih mạng. Mpeh săk nơm, wa Josephine Teo lah rjăp Singapore mra tâm mâp, tâm nchră, tâm dăch đah ăp dak têh, geh nau blau mpeh công nghệ kơt Mỹ, Nhật, Hàn Quốc gay ăp dak nê kơl an ân ăp ntŭk kan mpeh nau rnă njrăng mạng tâm ASEAN geh ndơn ndrel dŏng tâm nau mât rnă njrăng đăp mpăn./.

Nŭih rblang: H’Thi