VOV4.M’nông – Ôi 23/9, ta Ngih Quốc hội, Kruanh Quốc hội Vương Đình Huệ lĕ ƀư tơm rơh pah kan bah Kruanh Quốc hội đah Rnâng kan Ủy ban Kinh tế, djăt nău mbơh du đêt nkô̆ nău mpeh Dăp rgum dŏng neh ngih dak năm 2021-2030, uănh tât năm 2050, Trong nchrăp dŏng neh 5 năm (2021-2025) gưl ngih dak. Ntoh ngơi ta rơh rƀŭn, Kruanh Quốc hội Vương Đình Huệ lah rjăp, neh ntu lah drăp ndơ khlay bah ngih dak, yor rĭ, nău mât uănh dŏng neh mô dơi kơp an aƀaơ ma hôm an kơp lĕ tâm rgŏ năp; nkre, neh ntu an dơi tâm pă di đah trong uănh jŏ jong mô knŭng 5 năm mô lah 10 năm ma an ngai lơn tay tâm nău hun hao bah neh dak. Tĭng bôk nău kan, dăp rgum dŏng neh ngih dak năm 2021-2030, uănh tât năm 2050 n’hanh nchrăp dŏng neh 5 năm 2021-2025 mbra dơi mbơh an Quốc hội ta Rơh rƀŭn tal 2, Quốc hội khóa 15. Nchrăp, nkô̆ nău aơ mbra dơi Ủy ban Thường vụ Quốc hội an rgop tâm rơh tal 4 (khay 10/2021).

Nŭih rblang: Y Sưng Phê Ja