VOV4.M'nông: Dơn nău jă bah Kruanh Nghị viện châu Âu (EP) David Sassoli, Kruanh Quốc hội Vương Đình Huệ n'hanh mpôl ntơh măt gưl têh Quốc hội Việt Nam hŏ jŭr tât tach ndeh păr Melsbroek, Brussel, dak Bỉ khâl n'hanh pah kan đah Nghị viện châu Âu (EP), Liên minh châu Âu (EU) ntơm bah nar 8-9/9. Tâm rnôk hăn khâl ngăn rơh dja tât Bỉ, Kruanh Quốc hội Vương Đình Huệ geh rơh ôp srĭng nău đah Kruanh Hội đồng châu Âu, rgum nchră đah Kruanh Nghị viện châu Âu, Kruanh Hội đồng châu Âu, ntơh măt bah ăp nghị sỹ bah châu Âu tâm ăp Ủy ban khlay bah Nghị viện châu Âu kơt, Ủy ban mpeh tăch rgâl dak bah dih, aơ lah Ủy ban geh nău khlay n'gâng tơm, ntrŭt ntrôl nău tĭng ƀư hiệp định n'hanh ăp rmôt nghị sĩ tâm rnglăp đah Asean tâm ban kơt Việt Nam. Lơn lah, Quốc hội Việt Nam mbra ndrel đah Ủy ban tăch rgâl dak bah dih bah Nghị viện châu Âu nchră, jêng nău way kan rgop âk nghị viện gay ntrŭt ntrôl nău tĭng ƀư Hiệp định.

Bah năp nê, tâm rnôk hăn pah kan râng Tâm nchră ăp Kruanh Quốc hội lam ntŭr neh tât dak Cộng hòa Áo, Kruanh Quốc hội Vương Đình Huệ hŏ geh 3 nău lah khlay ta ăp rơh hop; nkre mâp bar ding đah 13 kruanh rđău kan gưl têh bah Quốc hội/Nghị viện ăp dak…. Lơn lah hŏ dơn rnoh vaccine, ndơ năp dŏng dak si rhŏ dŏng an pah kan njrăng n'gang nuh srê Covid-19 bah ăp doanh nghiệp, nsum mpôl, êng nuĭh ta Áo.

Nuĭh rblang: Điểu Thân