VOV4.M’nông – Ta thủ đô Vienna, Cộng hòa Áo, Rƀŭn nchră ăp kruanh Quốc hội lam ntŭr neh rơh tal 5 lĕ ntơm ƀư têh đah tât râng bah rlău 100 Mpôl kan ăp dak lah nuĭh kan tâm rmôt n’hanh nuĭh groi nđôi bah IPU. Mpôl ntoh măt gưl prêh Quốc hội Việt Nam yor Kruanh Quốc hội Vương Đình Huệ ƀư Kruanh mpôl kan lĕ râng rƀŭn nchră aơ. Jêh ntơm ƀư rƀŭn lĕ geh rơh tâm nchră lĕ rngôch đah nău ƀư tơm bah Kruanh IPU n’hanh Tổng thư ký IPU. Kruanh Quốc hội Vương Đình Huệ n’hanh nuĭh kruanh Quốc hội/Nghị viện ta lam ntŭr neh lĕ tâm nchră bôk nău: “Gay dơi geh hun hao nâp nâl đă rgum lơn tay tâm ăp ntil nău, uĕh lăng hơm răm an nuĭh ƀon lan, mât njrăng ntŭk ntô gŭ âm mô lah kơl lor hun hao wăng sa”. Ntoh ngơi ta rơh rƀŭn aơ, Kruanh Quốc hội Vương Đình Huệ nkoch nău mĭn êng nơm an lah hun hao nâp nâl an khlay tâm nău mât uănh săk soan kon nuĭh n’hanh mât njrăng ntŭk ntô lơn lah knŭng rgum an hao jêng wăng sa đah ăp ntil. Nău aơ tâm di đah nău rƀŏng hun hao nâp nâl tât năm 2030 bah Liên hợp quốc, nĕ lah nău tâm ban uĕh bah 3 nău rƀŏng wăng sa, rêh jêng n’hanh ntŭk ntô gŭ âm.

Nuĭh rblang: Y Sưng Phê Ja