VOV4.M'nông: Ôi 23/8, Đại hội đồng Liên nghị viện ăp dak ASEAN tâl 42 (AIP-42) đah nkô̆ "Hun hao tâm boh nghị viện tâm trong kan kỹ thuật mbrô nkrum lam rƀŏng tât jâng wăng sa nsum ASEAN năm 2025” ntơm pơk ngăn ta nâm nău ƀư tơm bah Kruanh AIPA, Kruanh Hội đồng Lập pháp Brunei Darussalam Pehin Dato Abdul Rahman Taib tĭng trong ƀư pơk sŏng dăng. Mpôl đại biểu gưl têh Quốc hội Việt Nam tă bah Kruanh Quốc hội Vương Đình Huệ ƀư kruanh mpôl tât râng AIPA-42 ta bôk ƀoh Hà Nội, Việt Nam. 

Tĭng bôk nău kan, bah ôi rgum hop lam lĕ rngôch lor bôk năp ƀư đah âk nkô̆ khlay. Kêng măng, Kruanh Quốc hội Vương Đình Huệ geh nău lah khlay, rgum uănh năl nô nău lam ntŭr neh, nkual, lôch nê nkoch khlay nău tâm boh bah âk ding n'hanh nău tâm rnglăp, dơn ngoăy bah ASEAN; nchih nkah ăp nău nsrôih bah ASEAN n'hanh ăp dak lăp kan nsum mât kân tay nuh srê COVID-19; lah rjăp nău nsrôih bah Việt Nam tâm pah kan njrăng n'gang nuh srê COVID-19 n'hanh nău mĭn bah Việt Nam mpeh tâm boh vaccine.

Nuĭh rblang: Điểu Thân