VOV4.M'nông: Nar 6/9, ta Phòng Thương mại Áo, Thủ đô Viên hŏ ƀư rgum nchră doanh nghiệp Việt - Áo tă bah Sứ quán Việt Nam, Bộ Kế hoạch n'hanh Đầu tư n'hanh Jrô kan wăng sa tăch rgâl Cộng hòa Áo ndrel ƀư. Âk mpưm doanh nghiệp Việt Nam n'hanh ntơh măt 20 doanh nghiệp tâm ăp trong kan prăk kaih, ngân hàng, dak si, mbơh nti, ntung trong, ndeh ôtô, ndơ ntrŭp dŏng rnă njrăng, puh n'hât ŭnh sa, nkret lêk ndŏk nhih dak si, nkra uĕh bah lơ ntô loih kông, tăch rgâl, luật, rhŏ dŏng trong trôk, ŭnh nar hŏ tât râng. Lah ta rnôk rgum nchră, Kruanh Quốc hội Vương Đình Huệ lah rjăp, Việt Nam ŭch rŏng, nsum mpôl doanh nghiệp bah Áo, Jrô kan tăch rgâl công nghiệp geh nău tam ngơi ntrŭt ntrôl ơm uănh an dŏng nău tâm ton ntuh kơl. Aƀaơ, Áo geh 37 trong nchrăp kan đah lĕ rngôch tơm prăk ntuh kơl nklăp 150 rkeh đôlar, rgum lơn âk tâm ăp trong kan công nghiệp nkret njêng n'hanh khoa học công nghệ. Mpeh tâm boh tăch rgâl, Áo way lah ngoăy tâm ăp ntŭk tăch n'gluh khlay bah Việt Nam n'hanh aƀaơ dôl gŭ tâm rmôt 5 ntŭk tăch n'gluh dŭt têh bah Việt Nam tâm mpôl EU. Kruanh Quốc hội Vương Đình Huệ ŭch rŏng đŏng, doanh nghiệp Áo ŭch tĭng gay Chính phủ Áo ntop kơl vaccine, ăp ndơ dŏng dak si khlay, kơl Việt Nam njrăng n'gang nuh srê./.

Nuĭh rblang: Điểu Thân