VOV4.M'nông: Ôi 30/9, ta Jay Quốc hội, Kruanh Quốc hội Vương Đình Huệ ƀư tơm rơh tâm nchră pơk sŏng dăng đah mpôl doanh nghiệp gưl têh bah Hội đồng tăch rgâl Hoa Kỳ- ASEAN. Rơh pah kan dơi ƀư tĭng nău dăn đă bah Mpeh Hội đồng tăch rgâl Hoa Kỳ- ASEAN, dơi pơk nthoi đah âk ntŭk rgum hop pơk sŏng dăng lah: Jay Quốc hội Việt Nam, Thủ đô Washington, D.C (Hoa Kỳ), Singapore, Philipine n'hanh ta du đêt dak êng ƀa ƀă lam ntŭr neh, gay mpơl nău ton bah nkual wăng sa bah dih ngih dak Hoa Kỳ đah nău khlay lah tâm boh tâm brê n'hanh tơm ndơ nsing nơm tâm nău ntrŭt ntrôl ăp rnoh tât kan an ƀư lor, lơn lah tâm rgâl mbrô n'hanh hun hao nâp jŏ bah Việt Nam.

Rơh pah kan hôm ntrŭt ntrôl tay tâm boh wăng sa, tăch rgâl, ntuh kơl đah bar ding ma ăp trong tâm rgâl n'hanh nchih nkah ăp nău dăn đă na nê̆ bah ăp doanh nghiệp Hoa Kỳ đah nău kan ƀư njêng tăch rgâl tĭng n'glĕ nău dơi kan bah Quốc hội, nău rgop bah Hội đồng n'hanh ăp doanh nghiệp Hoa Kỳ đah nău rdâk njêng trong kơl an rong lor bah Quốc hội Việt Nam, tâm ban kơt ăp nău dăn đă bah mpeh Việt Nam đah ăp nău kan tăch rgâl, ntuh kơl n'hanh pơk hvi ntuh kơl bah doanh nghiệp Hoa Kỳ ta Việt Nam.

Nuĭh rblang: Điểu Thân