VOV4.M'nông: Tâm nar 9-9 tĭng mông ta ntŭk, Kruanh Quốc hội Vương Đình Huệ n'hanh mpôl ntơh măt gưl têh Quốc hội Việt Nam hŏ râng Rgum nchră doanh nghiệp Việt Nam - Bỉ. Lah đah ăp doanh nghiệp dâk bôk năp bah Bỉ, Kruanh Quốc hội Vương Đình Huệ rnê âk nău blău ƀư mhe tâm nchră, uănh aơ lah rnôk uĕh gay ndrel tâm nkoch mpeh trong rƀŏng ntuh kơl mhe, trong nkra rgâl uĕh ntŭk ntuh kơl bah Việt Nam, nkre ndơ̆ luh ăp nău dăn đă gay n'hao nău dơi tam tâm boh, rƀŏng tât nău dơi bah ăp doanh nghiệp Bỉ rnôk ntuh kơl n'hanh tăch rgâl ta Việt Nam. Gay n'hao dăng lơn đŏng tâm boh wăng sa, tăch rgâl, ntuh kơl đah Việt Nam n'hanh dak Bỉ tâm let năp tay, ndăn ăp trong dơh soih mhe bah kơi nuh srê Covid – 19, Kruanh Quốc hội Vương Đình Huệ hŏ nkah du đêt trong rƀŏng tâm let năp tay. Tâm nê, dăn đă doanh nghiệp n'hanh ăp Hiệp hội doanh nghiệp Bỉ kơl âk lơn gay Nghị viện Bỉ ơm lôch jêh ăp si ƀŭt hăn tât uănh an dŏng Hiệp định mât njrăng ntuh kơl đah Việt Nam n'hanh EU (EVIPA) tâm nar dŭt ơm. Mĭn uănh pơk trong mpăr sŏng đah Bỉ n'hanh Việt Nam gay ntrŭt ntrôl ăp nău kan tâm boh wăng sa, pâl nđaih, ntĭm nti, tâm nđŭr ƀon lan kơl bar dak ntruch tay dăch nsum lôch nuh srê dơi mât kân dơi./.

Nuĭh rblang: Điểu Thân