VOV4.M’nông: Nar bôk pơh aơ, N’gâng kan neh dak hŏ ƀư nau Rgŏ jă nau kan tâm rlong ngăn đah nkô̆ “Tahen ndrel lam dak nsum n’hâm, nsum soan tâm rlong njrăng, rdâng ndrel lơh dơi srê Covid-19”. Kơt tĭng nau rgŏ jă, cán bộ, tahen tâm ăp rmôt kan tâm lam dak hŏ ntơm tĭng nau rđau leo tahen, nai dak si tât ăp n’gor mpeh ba dâng ƀư nau njrăng rdâng srê.

Ntoh măt Quân uỷ Trung ương, N’gâng kan neh dak, Hội đồng tâm rlong-rnê nkhôm neh dak, ƀư nau rgŏ jă nau tâm rlong, Đại tướng Lương Cường, Kruanh n’gâng kan chính trị tahen ƀon lan lah rjăp nau kan tâm rlong khlay “Tahen ndrel lam dak nsum n’hâm, nsum nau tâm rlong njrăng, rdâng ndrel geh nau dơi rlet bah srê Covid-19”, ƀư ân ăp cán bộ, tahen mro gĭt kloh nuih n’hâm “njrăng rdâng srê kơt rdâng phung rlăng”, “lơn jêr ri ân geh nsôih nau tâm rlong”, “hŏ nsôih ri ân nsôih lơn tay, hŏ tâm rnglăp ri tâm rnglăp lơn tay, nsôih kan lơn ri ân geh kan lơn tay”, n’hao ueh nau kan kơl an yor ƀon lan, yor neh dak, nau mĭn nsôih êng, rlet nau jêr, mra hăn lor tâm nau njrăng rdâng srê, ƀư ueh nau kan chính trị khlay, uănh nê lah nau kan tâm lơh bah tahen tâm rnôk đăp mpăn. Ăp rmôt cán bộ, tahen lam ƀon lan tâm ăp n’gor kŏ n’hao nau nsôih kơl an tâm rgop nsum đah ăp gưl uỷ, n’gâng kan tâm nkuăl rklaih nau jêr, kơl an rek, pĕ klih ndrel leo tăch ndơ tuch tăm, bum kao, pă ndoh ndơ kơl an nau rêh ndrel mât chăm n’hâm soan ƀon lan, nchrăp nau kan njrăng rdâng srê tâm rnoh prêh ngăn gay ma năn rdâng, rklaih, mô ân geh ndrât ndal tâm ăp nau tât.

Đại tướng Lê Lương Cường lah rjăp, lam tahen rgum tâm rlong, ntoh nuih n’hâm nsôih ân geh nau dơi, nchrăp, nsôih, hăn lor tâm nau kan râng ndrel ƀư jêh nau kan njrăng, rdâng srê:

‘ Lŏ tâm mâp dăch ngăn mpeh nau kan tâm dâng ndrel nau tât bah srê, ngăn lah ăp nkuăl tơm ngăn gay ma năn kơl nchră nau đah Quân uỷ Trung ương, N’gâng kan neh dak, rmôt kan ƀư nau kan bah Chính phủ tâm nkuăl mpeh ba dâng, rđau, đă ndrel Rnâng kan rđau nau njrăng rdâng srê ăp gưl tâm nau rđau đă nau kan njrăng, rdâng srê. Vay tâm rgop ngăn đah ăp gưl uỷ, n’gâng kan ndrel rmôt tahen tâm nkuăl mât ân nâp nau kan bah ăp rmôt, ăp ntŭk tâm nkuăl n’har bri, dak lêng, nsôih njrăng rdâng nau lăp tih dôih. Ƀư ueh nau kan bah ăp ntŭk nkhah rgum nŭih, ngih dak si dôl săm, nsôih râng xét nghiệm ndrel chuh vắc xin ân ƀon lan, săm ji ân ƀon lan, ngăn lah nŭih ji jâk tâm ngih dak si tâm ndrel bah dih tahen”.

Ta nau rgŏ jă 220 ntŭk tâm ƀoh nau ngơi tâm lam tahen kơt tĭng rjăp ngăn ƀư nau rgŏ jă nau tâm rlong ngăn ndrle ntoh nau nsôih, nuih n’hâm, nau kan đah ăp nau ƀư kan ngăn tâm nau njrăng, rdâng srê. Gŭ kan tâm ăp n’gor mpeh ba dâng dôl geh srê tât jêr, tâm nê geh nkuăl ƀon têh Hồ Chí Minh, Thiếu tướng Nguyễn Trường Thắng, Tư lệnh Quân khu 7 mbơh tâm moh nau kan ri rmôt tahen quân khu mra hăn lor njrăng rdâng srê:

‘Lam quân khu pơk nau tâm rlong prêh ngăn mpeh nau njrăng rdâng srê kơl an ƀon lan, tâm rgop ngăn đah gưl uỷ, n’gâng kan, rmôt kan ndrel ƀon lan, ăp rmôt kan n’gâng kan ƀư ân tâm ban, ƀư ân rjăp ăp nau kan njrăng, rdấng rê, pơk hvi nkuăl geh dơi, rgum nkuăl mô dơi, ƀư jêng tât nau ueh nâp tam tâm ăp nkuăl mô dơi. Nkre râng ân săk tam ngăn nau kan kơl an bah nau ji ngot, ji kuet, nsôih mô ân ƀon lan ji ngot, mô tŏng sa ndrel jêr jŏt”.

Đah rmôt kan tahen biên phòng, N’gâng kan rđau tahen biên phòng ăp n’gor mpeh ba dâng ndrel Bắc Trung bộ hŏ săch 58 nŭih tât râng ntĭm mbơh nau kan bah ăp nai nti, nai dak si Viện Y học dự phòng tahen ndrel cán bộ jrâu kan tahen biên phòng. Ăp nŭih râng jrâu nti hŏ geh mbơh ntĭm gay n’hao nau blau, nau kan, nau dơi njrăng rdâng srê Covid-19, mra hăn tâm ntŭk duh jêr đah tahen ƀon lan miền Nam, nchrăp ueh nau kan gay ma ngăch tâm rgop ƀư ăp nau kan, nsôih rgop nsum ma ăp rmôt kan bôk năp ndal njrăng, rdâng lơi ndrel nkân ueh srê Covid-19 tĭng nuih n’hâm rđau kan bah Thủ tướng Chính phủ. Tâm nar hăn, Trung tướng Đỗ Danh Vượng, Chính uỷ, Tahen Biên phòng lah rjăp:

‘Ntoh măt rđau kan Đảng uỷ, Bộ tư lệnh gâp jao nau kan ân oh nô, ŭch bah Đảng uỷ, Bộ tư lệnh, ê lor lah oh nô ân geh saơ kloh nau jêr, nau kan ŭch ndal bah nau kan njrăng, rdâng ndrel nau mĭn ân tŏng ăp nau kan, nau dơi ueh ang bah tahen lah nsum, bah tahen biên phòngh lah êng ndrel ngăn lah rmôt quân y biên phòng tâm nau kan tâm lơh aơ, saơ kloh nau kan ntô̆ n’hao, tă bah nê gĭt kloh nau nsôih, nau mĭn bah nơm ndrel ma lam tahen, lam ƀon lan njrăng, rdâng srê ndrel mra geh nau dơi bah srê. Kŏ mra ndơn ăp nau kan rtĭng nau rđau đă bah ăp ntŭk kan, rmôt kan tâm nau kan ma nơm geh n’hao ƀư, gay mhâm ƀư ân nơm njrăng rdâng ueh ngăn ndrel geh nau dơi ueh ngăn, ngặch ngăn bah srê Covid-19, đăp mpăn n’hâm soan, đăp mpăn nau rêh bah ƀon lan tâm lam dak nơm”.

Mra dơi lah bơi tât 2 năm ma aơ, tahen biên phòng hŏ mro lah rmôt hăn lor mpeh bôk năp, ndâk ndrel ƀư ntrong n’gar rdâng tâm nkuăl n’har bri, đah 1.974 ntŭk, tâm 8221 cán bộ tahen biên phòng râng njrăng rdâng nau luh, lăp dak tih dôih, ndrel njrăng, rdâng srê, rgŏ jă nau kan lam ƀon lan râng njrăng, rdâng srê Covid-19 ndrel luh lăp tih dôih tâm lam ăp ntrong nkuăl n’har bri ndrel geh nau blau mhe tâm nau pă ntrong gay ma nkân nau luh lăp tih dôih ân rjăp tam, đăp mpăn njrăng rsê tâm mpông luh lăp, mô klach rvê nau jêr, nau ntưp, nau tât ntưp gay ma nsôih râng kơl an ƀon lan tâm ăp ntŭk bu tâm nkhah nŭih, nkuăl bu nchueng rdâng. Tâm nar ntơm leo hăn tahen rơh aơ nê lah nau tơm mpeh ntoh nuih n’hâm mra kơl an ăp ntŭk dôl ma geh nau tât jêr “hăn ăp ntŭk, ƀư ăp nau kan rnôk geh neh dak ŭch” bah tahen grat ndri./.

Nŭih rblang: H’Thi