VOV4.M’nông – Kơp bah 6 mông tât 12 mông nŭng nar 24/5, Việt  Nam geh 33 nuĭh ntưp mhe Covid-19, tâm nĕ 28 nuĭh ta Bắc Giang, 4 nuĭh ta Hải Phòng n’hanh du hê ta Đà Nẵng. 28 nuĭh dơi saơ tâm nkual nchoeng n’gang, geh tât ntŭk srê Nkual công nghiệp Quang Châu, Vân Trung, Đình Trám. Kơp tât 12 mông nar 24/5, Việt Nam geh dĭng lĕ 3.823 nuĭh kơp dơn tâm dak n’hanh 1.485 nuĭh lăp sĭt. Tĭng nău mbơh bah Tiểu ban Săm n’hanh rmôt nchroh nuĭh ji Covid-19 mbăn, kơp tât ôi 24/5, Việt Nam dôl săm an 2.258 nuĭh ji Covid-19, tâm nĕ rlău 50% rnoh nuĭh ji ntưp Covid-19 tâm rơh aơ êng ta Đà Nẵng. Ta Đà Nẵng, dŭt âk nuĭh ji ta lvang mbăn bah ji leh mô lah ntưp nău ji jêr bah nu nău lĕ jŏ. Yơn lah, ta rơh srê aơ, rgâl ntil kaman geh tu tơm ta Ấn Độ, rlău ma nău ntưp ngăch, du đêt nuĭh ji mom, mô geh nău kop ji ơm yơn rgâl mbăn, dơi ntop kơl nsôr oxy, nsôr đah măy.

Nŭih rblang: Y Sưng Phê Ja