VOV4.M'nông: Ôi 8/10, Lâm Đồng năl geh tay 30 nuĭh ntưp Covid-19, tâm nê geh 25 nuĭh geh tât tơm nuh srê ƀon tăch kao Vạn Thành, phường 5, nkual ƀon têh Đà Lạt. Aƀaơ, Ƀan rđău đă njrăng n'gang nuh srê n'gor Lâm Đồng hŏ rđău đă Ntŭk rgum mât kân nuh srê Lâm Đồng n'hanh ăp nhih pah kan geh tât ndăn ngăch ôp uănh, ƀoi tĭng, nchih wăr, an gŭ rgum êng, sŏk mham ăp nuĭh geh tât.

Rlău ma tơm nuh srê ta ƀon kao Vạn Thành, n'gâng kan dak si n'gor Lâm Đồng năl geh tay 5 nuĭh ntưp Covid-19 mhe, tâm nê 2 hê lah ur sai bah nuĭh ƀĭt ndeh rdeng ndơ tâm n'gor, 2 hê sĭt bah nkual ƀon têh Hồ Chí Minh n'hanh ƀa ƀă lah nuĭh sĭt bah Bình Dương. Ndrĭ, kơp tât ôi nar 8/10, Lâm Đồng năl geh 322 nuĭh ntưp Covid-19, tâm nê geh 264 nuĭh hŏ dơi săm bah n'hanh sĭt nhih dak si. Aƀaơ Lâm Đồng dôl an gŭ rgum êng 5.921 nuĭh, tâm nê geh 95 nuĭh an gŭ rgum êng dak si, 3.180 an gŭ rgum êng n'hanh 2.646 nuĭh an gŭ rgum êng ta jay./.

Nuĭh rblang: Điểu Thân