VOV4.M’nông: Lơ 6/10, UBND n’gor Lâm Đồng geh nau ntrŭnh rđau đă ăp n’gâng kan, ntŭk kan, rmôt kan ndrel UBND ăp nkuăl, nkuăl ƀon têh tâm n’gor nchrăp mra chuh vắc xin njrăng rdâng srê Covid-19 âk. UBND n’gor Lâm Đồng jao ân N’gâng kan dak si ƀư tơm, tâm grop nsum đah ăp ntŭk kan, n’gâng kan geh tât ndrel UBND ăp nkuăl, nkuăl ƀon têh tâm n’gor ƀư nau kan, nchrăp ăp ntil ndoh ndơ, ndơ dŏng, nŭih ƀư nau ntrŭnh nau kan chuh vắc xin ntơm rnôk aơ ân tât lôch năm 2021.

Ndrel ma nê, ntơm kơp rgum rnoh ndrel nchih moh săk ăp nŭih geh nau kơl an chuh lor tĭng nau ntrŭnh. N’gor mhe ndơn 200 rbăn dĭng vắc xin Vero Cell yor N’gâng kan dak si pă ndrel dôl ƀư ăp nau ntrŭnh chuh rơh 1 tâm ăp nkuăl, nkuăl ƀon têh tâm n’gor. Ndrel đah rlau 233 rbăn dĭng vắc xin hŏ geh ƀư chuh ntơm bah ntơm ndrel nau nchrăp mra pă vắc xin Covid-19 tâm rơh tât, lôch năm aơ, Lâm Đồng mra geh 70% rnoh nŭih rlau 18 năm geh chuh./.

Nŭih rblang: H’Thi