VOV4.M’nông – Nar 16/7, UBND n’gor Lâm Đồng geh sam ƀŭt ndăn ngăch mpeh nău ƀư tĭng ngăch, dŭt n’hâm ăp trong nking n’gang, njrăng Covid-19 lăp tâm n’gor. Kơp dơn 4 nuĭh ntưp Covid-19 na nao lah ăp nuĭh ƀĭt ndeh, nuĭh nchoăn rdêng ndoh ndơ hăn trong nkual ƀon têh HCM-Lâm Đồng n’hanh rlơ̆ tay, UBND n’gor Lâm Đồng ntĭm rđău N’gâng kan ntung trong ƀư tơm, trok dơn nău kan n’hanh mĭn tâm rgop đah UBND ăp nkuăl, nkual ƀon têh tâm n’gor geh trong na nê̆ gay n’hao trong kan mât uănh nuĭh ƀĭt ndeh, nuĭh kơl nchoăn rdêng ndơ trong ngai ƀa ƀơ luh, lăp tâm n’gor.

Lâm Đồng ndăn ngăch chuh vaccine njrăng n’gang Covid-19 an nuĭh ƀĭt ndeh, nchoăn rdêng ndoh ndơ

Ndrel đah nĕ, UBND n’gor đă N’gâng kan ntung trong mbơh ăp ntŭk tăch rgâl nchoăn rdêng ndơ ƀư uănh năl Covid-19 an nuĭh ƀĭt ndeh, nuĭh kơl nchoăn rdêng ndơ 3 nar/du tơ̆. Lah ăp nuĭh ƀĭt ndeh, nuĭh kơl nchoăn rdêng ndơ mô geh uănh năl Covid-19 mô ntưp mbra dơi an hăn ăp ntŭk uănh nđôi srê Covid-19 kơp bah n’gul măng nar 18/7. UBND n’gor Lâm Đồng đă n’gâng kan ntung trong n’gor ndăn rgum, nchih săk nuĭh ƀĭt ndeh, nuĭh kơl nchoăn rdêng ndơ ta lam n’gor gay ndâk ƀư trong nchrăp ngăch chuh vaccine an ăp nuĭh aơ.

            Nŭih rblang: Y Sưng Phê Ja