VOV4.M’nông: Ndrel đah nau kan ndâk njêng ƀon lan mhe, n’gor Lâm Đồng dôl nsôih ƀư Bôk nau kan du xã du ntil ndơ (OCOP). Ăp năm rlau aơ, n’gor aơ hŏ ntuh kơl rlau 13 rmen 300 rkeh prăk gay ƀư nau kan hun hao văng sa bôk nau kan OCOP. Bah nê, rgop nau hun hao văng sa ƀon lan, n’hao nau geh ntil ndơ, gay ơm jêh Bôk nau kan ndâk njêng ƀon lan mhe năm 2021 ndrel ăp năm ba kơi.

Lâm Đồng lah 1 tâm 9 n’gor, nkuăl ƀon têh geh Chính phủ săch, rdau nau ntrŭnh ƀư bôk nau kan OCOP lvang năm 2018-2020 rƀŏng tât năm 2030. Bah 2 năm ƀư, nkuăl aơ hŏ geh 124 ntil ndơ geh kơp dơn OCOP 5 sao, 4 sao ndrel 3 sao gưl n’gor ndrel neh dak. Nau tă geh aơ lah nau nsôih ngăn bah n’gor Lâm Đồng tâm nau ntrơn rgâl nau kan văng sa, ndâk tay nau kan tuch tăm gay hun hao văng sa tâm nkuăl ƀon lan, n’hao nau geh, nau rêh jêng bah ƀon lan tâm bôk nau kan ndâk njêng ƀon lan mhe, ăp nhoat ƀư ân săk tam ăp nau kan mpeh văng sa ndrel ƀư nau kan tuch tăm.

Ta Lạc Dương, nkuăl geh ân lah ang ngăn tâm nau hun hao ăp ntil ndơ tơm tĭng bôk nau kan OCOP. Jêh 2 năm ƀư nau kan OCOP, rnoh geh tă bah nau kan tuch tăm bah nkuăl geh 300 rkeh/ha/năm, âk rlau 3 tŏ rđil nau geh bah lam dak. Lạc Dương kŏ geh âk nau kan tuch tăm prêh mhe, tuch tăm blau ndrel nau tâm rgop, leo tăch dŏng ân ƀon lan, bah nê, der dơi nau khuch “geh âk, ma thuk rnoh”. Tĭng Kruanh UBND nkuăl Lạc Dương, Sử Thanh Hoài, gay kơl an ƀon lan ntrŭt dăng ndơ geh OCOP nkuăl ăp nhoat ƀư jêh nau rgum ndâk nkra ntŭk ê nkra ndơ tuch tăm jêh rnôk rgum ƀư 25 ha. Êng nê, lŏ ntuh kơl tâm ăp nau kan hun hao tơm dak si khlay bah kônh wa ăp rnoi kơt lah: Atiso, sâm Ngọc Linh…

Nkoch tât nau geh jêng bah nau kan ntrơn rgâl tơm tăm ndrel nau ntr ŭnh ntr ŭt dăng ntil ndơ OCOP, Kruanh UBND xã Đạ Sar, Liêng Jrang Ha Ro Ky mbơh, năm 2016 nau geh du hê bôk nŭih bah nkuăl knŭng geh 18 rkeh n’gul, tât năm 2020 hŏ rlau 42 rkeh/nŭih/năm. Đah rnoh aơ, nŭih ƀon lan đăp mpăn nau kan tuch tăm.

Play hồng pâr ma n'hâm sial kro.

Dơi geh ntĭm nti nâp, kơl an khoa học, công nghệ, nê lah nau tơm gay ƀon lan dơi rlet hao jêng sâm geh tâm nkuăl neh ƀon tơm nơm. Nkoch tât ăp nau geh văng sa tă bah nau kơt tĭng nau pâr n’hâm soan đah play hồng tâm nkuăl, Kruanh rmôt kan ƀon lan xã Xuân Trường, Nkuăl ƀon têh Đà Lạt, n’gor lâm Đồng Lê Thịnh mbơh, bah năp nơh ê geh nau kơt tĭng kan Nhật bản, nŭih ƀon lan knŭng tăch play hồng rêh đah rnoh dêh (khlay ngăn lah 300/kg). Jêh rnôk ƀon lan geh râng nti ndrel ƀư tơm nau kan pâr ma n’hâm soan geh ƀon lan ndơn. Dŭt năm e, ntil ndơ aơ geh kơp dơn OCOP 3 sao. Tĭng nau kơp bah ƀon lan, gay geh du kg hồng pâr, nŭih ƀon lan pâr ntơm 4 tât 5 kg play ri geh rnoh ntơm 12 tât 15 rbăn. Yơn rnôk sơh, mra geh rnoh 250 rbăn/kg, jêh rnôk nkŭp rnon, nŭih ƀon lan ndrel ntŭk kan geh rnoh prăk săk rnglay âk. Rnôk aơ, rnoh geh du hê bôk nŭih ăp năm tâm xã Xuân Trường geh 110 rkeh. Nau dơi aơ rgop nau joi luh trong mbơh mpeh nau geh tâm nau ndâk njêng ƀon lan mhe tâm nkuăl.

Tĭng Giám đốc N’gâng kan tuch tăm ndrel hun hao ƀon lan n’gor Lâm Đồng Nguyễn Văn Sơn, nkuăl dôl ntrŭt dăng nau rgâl mhe ndrel hun hao nau kan ƀư, tâm rgop tuch tăm, ma nau tơm lah ƀư hun hao ăp nau kan tâm rgop nau e ẻnka, leo tăch, ntrŭt dăng hun hao ntil ndơ, nau dơi “Đà Lạt-nau geh jêng ta ưbah neh ueh” ndrel ƀư bôk nau kan du xã du ntil ndơ OCOP. Bah năp măt, ntrŭt dăng nau kơt tĭng nau kan prêh mhe tâm nau ê nkra ndrel ƀư ăp ntil ndơ OCOP tĭng nau kan jru, rgop nau n’hao nau geh ndơ tâm du rnoh neh tăm ma âk lơn rđil đah bah năp.

Dơi gĭt, tât aơ tă, n’gor Lâm Đồng mra ntrŭt dăng nau kan ê nkra ueh lơn tay ăp ntil ndơ geh nau dơi, geh ân lah nau geh jêng bah nkuăl ndrel bonh đă ƀon lan, rmôt kan tâm nthoi jêng ntrong kan, gay njêng ăp ntil ndơ tŏng dơi nau geh kơp dơn OCOP. Nau tâm rgop hun hao nau kan pâl n’aih tăm mir gay hun hao văng sa. N’gâng kan tuch tăm ndrel hun hao ƀon lan dôl ndal ntrŭnh ƀư jêh nau kan hun hao tuch tăm tĭng nau kan âk ntil, âu nau kan ndrel pâl n’aih leo ndrel geh nsum ma nau kan tuch tăm./.

Nŭih rblang: H’Thi