VOV4.M’nông: Ntŭk kâng n’har đah nkual ƀon têh Đà Lạt, ntŭk geh rnoh nuĭh ntưp Covid-19 âk ngăn bah n’gor Lâm Đồng, yơn knơm mât uĕh nuih n’hâm tâm rnglăp tâm trong kan njrăng n’gang srê, nkuăl Lạc Dương hôm e lah “ntŭk đăp mpăn” mô kơp dơn nuĭh ntưp Covid-19 du hê. Gay mât uĕh săk rnglăy aơ, nuĭh ƀon lan ta ăp ƀon, lan ntŭk aơ dôl ndâk njêng ăp rmôt mât njrăng êng ntŭk đăp mpăn, tâm pă nuĭh kâp njrăng măng nar gay gĭt ăp nău ƀư luh lăp tâm nkual.

          Rnôk bah năp đaơ, bôl nar duh mô lah mih, rlău 10 nuĭh druh ndăm bah Rmôt kan mât uănh êng nkual đăp mpăn bah thôn 1, xă Đạ Sar, nkuăl Lạc Dương (Lâm Đồng) hôm e mât nău ƀư n’hanh ƀư uĕh nău kan njrăng, n’gang srê Covid-19 bah nơm. Ntơm bah bôk trong bê tông lăp tâm thôn geh nuĭh kâp njrăng măng nar gay uănh nđôi ăp nău ƀư luh lăp, ngăn lah ăp ndeh n’hanh nuĭh mha bah ntŭk êng tât. Wa Păng Ting Doanh, Kruanh rmôt, rmôt mât njrăng êng an gĭt, bôl nău kan ŏk r’ah yơn ăp druh ndăm bah rmôt mât uănh êng hôm e tâm pă nar, tâm pă kâp njrăng, đăp mpăn nău kan mât uănh nkual đăp mpăn-nkual mô geh chôt srê Covid-19 an ƀon lan.

          “Rnôk geh nuĭh mha tât ri he nchih na nê̆ mrô bŭt ndeh, săk khân pơng, ntŭk gŭ moh ntŭk. Êng nău hăn uănh nđôi ƀa ƀơ dơi ƀư bah dŭt jŏ hôm. Kônh wa ta aơ tĭng dŭt uĕh nău mbơh săk soan, ƀư tĭng 5K, aơ lah nău dŭt rhơn, dơh oi ŏk r’ah an rmôt njrăng n’gang Covid-19. Gâp dŭt ŭch an mât uĕh n’hanh pơk hvi ntrong kan aơ gay tŏng ăp njrăng n’gang srê an đăp mpăn, du hê yor ăp nuĭh”.\

Ăp ndeh n’hanh nuĭh bah ntŭk êng tât dơi ăp Rmôt mât uănh êng nkual đăp mpăn nchih na nê̆ ăp nău mbơh khlay

Xă Đạ Sar, nkuăl Lạc Dương êp n’har đah nkual ƀon têh Đà Lạt, lŏ gŭ ta trong Quốc lộ 27C jêng ăp nar geh dŭt âk nuĭh hăn tâm ntŭk. Wa Phạm Ngọc Giáo, ta phường 9, nkual ƀon têh Đà Lạt, nuĭh ƀa ƀơ hăn nsong ntŭk uănh nđôi srê Covid-19 an gĭt, yor geh mir tuch tăm tâm nkual jêng ăp nar wa n’hanh âk nuĭh bah ntŭk êng tât ta aơ. Ăp tơ̆ hăn nsong an ƀư mbơh săk soan tŏng ăp, bôl roh mông nar yơn aơ lah nău dŭt khlay. Wa Giáo an gĭt:

          “Ndrĭ lah măng ir, bah he jêng yor nsum mpôl mô an nsum mpôl yor he. Đah săk gâp nơm lah du nău ƀư mhe dŭt uĕh tâm yan srê aơ yor pơng tâm di. Srê aƀaơ pơng mô geh rup gui, ƀô, nuĭh gĭt pơng ntŭk gŭ jêng njrăng n’gang lah uĕh ngăn”.

N’ăp đah nuĭh ƀon lan ta ntŭk hăn nsong dơi mbơh săk soan tŏng ăp

          Mô knŭng xă Đạ Sar, ăp thôn, ƀon, tổ dân phố bah ăp xă, nkuăl têh ta nkuăl Lạc Dương ndâk njêng rmôt mât njrăng êng nkual đăp mpăn, nkual mô geh srê Covid-19 n’hanh dơi nuĭh ƀon lan tâm ban kơl. Tĭng yuh Kơ Să Ka Liêm, Bí thư Đoàn xă Đạ Nhim, bah năp đaơ kônh wa tâm ƀon mô hŏ wât n’hanh geh trong uănh têh tâm nău ƀư tĭng ăp trong njrăng n’gang srê Covid-19. Bah nar ndâk njêng rmôt mât njrăng êng nkual đăp mpăn, ăp druh ndăm ntrôl dăng nkoch trêng jêng aƀaơ ăp nuĭh tĭng uĕh nău wăn bok put mbung, mbơh săk soan ăp rnôk hăn luh lăp bah dih.

          “Ndâk ƀư ntŭk kâp njrăng nar bôk năp jêr jŏt yơn jêh nĕ nkoch trêng nuĭh ƀon lan wât njrăng n’gang srê mô hôm jêr jŏt tay. Aƀaơ nuĭh ƀon lan, n’ăp mpôl druh ndăm lĕ ƀư tĭng dŭt uĕh nău njrăng n’gang srê. Tŏng ăp wăn bok put mbung mro n’hanh ăp trong ƀư 5K rnôk hăn bah dih”.

Ăp ntŭk kâp njrăng bah Rmôt mât uănh êng nkual đăp mpăn ta nkuăl Lạc Dương rgop khlay tâm trong kan njrăng n’gang srê Covid-19 bah ƀon lan.

          Lạc Dương lah nkuăl geh dŭt âk nuĭh ƀon lan lah nuĭh rnoi K’ho gŭ rêh. Bôl êp n’har đah nkual ƀon têh Đà Lạt, ntŭk geh rnoh nuĭh ntưp Covid-19 âk ngăn tâm n’gor yơn Lạc Dương aƀaơ ntŭk mô hŏ kơp dơn nuĭh ntưp Covod-19 du hê. Gay dơi geh săk rnglăy aơ, rlău ma nău nsrôih nsum bah rmôt kan dơi kan n’hanh n’gâng kan ƀon lan, ăp rmôt mât uănh êng nkual đăp mpăn ta ăp ƀon lan ƀư tơm dŭt khlay, rgop dŭt têh tâm trong kan njrăng n’gang srê Covid-19 bah Lạc Dương lah êng n’hanh Lâm Đồng lah nsum./.

          Nuĭh rblang: Y Sưng Phê Ja